谷祖琳赞刘青云床戏超专业：唔知佢尺度咁劲 爆「老公」同女仔倾偈会变话题终结者丨独家
发布时间：07:00 2024-12-11 HKT
谷祖琳跟刘青云相隔15年在电影《爸爸》中再合作，戏中饰演恩爱夫妻，她大赞平时在片场唔多出声的青云，为建立「夫妻情」好努力跟她混熟，可惜唔多识同女仔倾偈，经常变话题终结者。讲到两人有场激烈床戏，小谷话事前他们完全零沟通，更不知青云会有超出专业尺度演绎，到现场青云除下浴袍才知咁劲。采访：杜杜 摄影：谭志光 发型:Joe化妆:娴仔 场地: 212 Studio
努力营造「夫妻情」
小谷跟青云自2009年《扑克王》后再合作，小谷认为青云很努力跟她，望尽快建立「夫妻情」，所以在拍摄现场转变很大，「今次佢开工好nice，因为佢通常开工系唔讲嘢，喺呢套戏就冇呢样嘢，系咁撩人倾偈，但系啲topic错晒，哈哈！」她举例化妆时跟化妆师吹水，青云亦尝试努力搭嘴，「我同化妆师讲我唔钟意条眉咁粗，太粗唔知点，跟住佢加把口话，『呢个我明吖』，跟住我望住佢条眉系劲粗，就明佢真系想切入个话题，但系佢系个话题嘅终结者，哈哈！」她笑指「老公」𠱁细路还可以，但跟女仔沟通就完全唔掂，「佢又会无端端问我『小谷你属咩㗎』，我话『你唔会问个女演员属咩㗎』，佢可能谂我系咪开𠮶味星座、八字，feel到佢系搲水吹，佢同小朋友系冇问题，但系女性沟通比较弱，我话『你真系好少同女仔倾偈嘞』，有啲男仔同女仔倾偈好叻，证明佢真系好好丈夫、好好巿民刘先生，但同女性谈话系话题终结者，但佢系好可爱，好想用心去沟通。」
拍床戏完全冇压力
电影以2010年「荃湾享和街弑母杀妹案」作为故事蓝本，戏中小谷演的「胡金燕」，惨被患有思觉失调的儿子杀害，这情节一度令她「缩沙」，因她本是易惊「体质」 ，「之前做灵异戏都会惊，都系顶硬上，电视播睇返都会谂点解我会够胆做呢啲戏㗎？！我好容易惊，好多恐惧喺裹面，要了解自己点解惊，就要接呢个角色，要去面对呢样嘢。」反而跟青云的大胆床戏，小谷完全不担心，因2001年拍《野兽之瞳》早已有经验，「我入行第2套戏就系《野兽之瞳》，𠮶次后都有少少免疫，一啲都唔惊唔担心。」不过她想不到当时作为新人蒙查查拍床戏，竟然今次情况会差不多，「当年我因为太新，知得越多就越衰，佢哋都系好人家嚟，唔系想𠱁我去拍啲咩。唔知我命运系咪咁，我拍亲啲床戏都唔系好知，冇去倾，可能导演就系要我呢样嘢，唔会畀好多准备我。」
翁子光做沟通桥梁
小谷跟青云拍床戏事前零沟通，最终分别透过导演翁子光取得共识，「大家喺大屿山拍最尾𠮶场沙滩戏，佢好似有啲嘢讲，但系又唔好意思讲咁，我就打电话畀导演，叫佢同刘先生讲𠮶场戏唔需要就住，我系唔介意，因为刘先生系好gentleman，我同佢啲戏好亲密，每次cut机佢会即刻弹开。」她当时跟翁导沟通后，认为这场床戏必需达到一个效果，「我系用咗个字intense，我唔系要理露几多，或者动作系点，总之两个人系要紧密程度系要好浓，刘生不约而同同导演都系咁讲，咁就掂咗。」由于事前没跟青云倾过这场床戏，埋位时才知对方尺度，「唔知佢个尺度咁劲，我冇谂过刘青云会咁样，佢埋位前着住件浴袍，佢话『你唔会估到我有几专业』，我话『系呀，得你专业我够专业啦』，但佢一除浴袍我话『你赢咗，你专业我输』，佢真系好专业。」
用放养式教导女儿
电影讲到父母跟子女关系，小谷谓一直不会「敦」起妈妈款对待囡囡，所以跟现在分别12岁的刘心和10岁的刘悦关系极好，「当然𠵱家佢哋teenage会有啲问题，开始嚟料，每日喺度学习，暂时佢哋乜嘢都肯同我讲，已经OK。」她自爆本身性格属放养式家长，间接形成跟囡囡有好沟通，「我唔系特登㗎！我真系唔系太care成绩，我唔系虎妈得离谱，哈哈！我直情话如果你真系唔想读书，真系唔好返学，系劝返佢转头，唔好嘥自己时间，读书唔等如就成功㗎！佢哋仲反而怀疑𠻹，个个朋友都读㗎㖞！」她强调这绝非激将法，「我同佢哋讲，唔专心千祈唔好补习，补习好贵，唔想咪嘥时间，佢哋知我真系会cut晒啲嘢，佢哋咁大个人，知道有啲嘢真系要做，反而逼佢咪唔做啰！」
