77岁汪明荃首爆退休方案 ：做网红 分享成功艺人心得 : 生活要检点丨独家
发布时间：07:00 2024-11-15 HKT
77岁汪明荃(阿姐)德高望重，深受后辈爱戴，陈慧琳、容祖儿、杨千嬅、林家谦和卢瀚霆（Anson Lo）扑住去做她个唱表演嘉宾。红足超过半世纪的阿姐分享作为成功艺人之道，除要具备个人风格及紧贴潮流不断求变外，最重要私生活一定要检点，尤其强调：「任性只会自食其果。」另外，打算做埋这几年的阿姐首爆将来的退休方案，原来打算转做网红：「重温旧事，就算讲只狗都有排讲啦。」 采访：方骞平 摄影：朱伟彦 服装提供：Issey Miyake@Alphago International Limited 化装 ：Stephen Lau @ Stephenmakeup 髪型：Eric Yu
等咗7年，汪明荃于本月23及24日举行红馆个唱，阿姐相当期待：「fans成日睇我做大戏唔够嘛，佢哋未必系大戏迷。」阿姐更特地揾来林家谦及黄伟文等星级团队打造演唱会主题曲《Make my day》答谢fans多年来支持，顺道孖住钟柔美、谢安琪、Anson Lo、林奕匡共舞造势。
年青一代赞MIRROR几好
阿姐能融入年青人世界：「我哋梗系想有多啲年轻人啦，我同班后生都夹㗎，佢哋都受我玩。」虽然阿姐认唔到太多后生面孔，但就赞MIRROR几好：「其实要喺男团入面突围而出好难，要靠自己，一定要有个人风格，如果个个都系韩仔咁嘅样及衣著，就冇办法认得到㗎啦。」当问到阿姐，靓仔是否会望多两眼时？她爆笑回应说：「𠵱家(做艺人)一定要靓啦，唔靓就睇《中年好声音》…」
科技主导自己人生
对于陈志云网台节目中提及的「阻人上位」论，阿姐强调自己不会阻住地球转：「就算系做大骚司仪，我只系做头及尾，畀晒机会佢哋㗎，咁样我仲会叹啲！每个人有自己嘅角色，𠵱家我嘅位置系辅助佢哋，每个阶段要做啲适当嘅嘢，就算年纪大咗做阿妈依然有得发挥。」提到退休问题，阿姐形容应该都是做埋这几年：「希望5年后都做得到演唱会啦，但当感觉到体力都唔得，连台词都记唔到点做落去？连自己都接受唔到就冇谓勉强。」阿姐又首爆退休生活方案：「到时自然有嘢做啦，钟意做就做，除咗可以做导师教人，甚至开个网台重温旧事，是但讲个奖都可以，咁多奖足够讲一年，就算讲只狗都有排讲啦，好多网民钟意睇我啲开箱片，即使生活日常，喺花园晒衫、晒袋、盂兰节烧衣都成热话。」被记者大赞好有谂头的阿姐秒答：「我谂头梗系唔差啦。」阿姐仲自爆系YouTube迷，会睇些关于政治的网台节目，亦感恩科技发达：「𠵱家可以喺社交网做宣传，自己主导自己人生，咁样好好呀。」
投诉老公危险驾驶
演戏超过半世纪的阿姐认为所做的事都有成绩，所以没遗憾事，反而觉得演艺人生好幸福，阿姐又分享作为成功艺人之道，除咗不能停留不断求变外，也要保持个性及keep住好形象，谨记要做个正常人：「因为我哋嘅米饭班主系观众，佢哋识得分辨艺人戏里戏外嘅『角色』，尤其大家都接受唔到嘅私生活，咁就会自食其果，所以做艺人要检点啲，做人做戏都要做得好，只管任性做啲自己喜欢嘅事就要负返责任；反而肯帮人、爱护长者、回餽社会自然会加分。」另外，保持心境开朗、生活简单是阿姐77岁的保养心得，她强调怕痛不做微调：「我唔介意畀人话有皱纹，觉得自然老去会好啲。」阿姐生活开心，身为老公的罗家英当然有功劳，他带给阿姐不少生活情趣：「我哋都好锡对方，咁两公婆对几十年，日日夜夜嘈交唔得㗎嘛。」阿姐唯一投诉是家英哥时常「危险驾驶」：「佢好多时开车行到两线中间，咁危险点会唔出声？我都好惊呀！但佢会唔钟意，咁我咪收声啰。」
