饮食｜荞麦面曾经系穷人恩物？ 日本人唔会俾女儿下嫁食荞麦嘅人？
讲到日本人最爱面食，除咗拉面、乌冬之外，荞麦面一定榜上有名。佢嘅受重视程度，甚至比其他面食更高。好似东京人喺过年前一天，习惯食年越面，象征延年益寿。而年越面，就系荞麦面。佢亦同鳗鱼、寿司、天妇罗并称为江户四大美食，十分巴闭。
荞麦面同鳗鱼、寿司、天妇罗并称江户四大美食。
愈贫穷愈荞麦
过年前一日要食荞麦面，咁吉利，咁荞麦面一定系代表富庶，喻意丰衣足食啦。如果你咁谂，就大错特错喇。荞麦面喺旧时嘅日本，原来系同饥荒、贫穷等等有关。佢嘅起源，都系同贫瘠扯上关系。话说荞麦呢种农作物，并非源自日本，而系产于东亚北部高纬度寒冷嘅贫瘠土地上，呢啲地方，连小麦都种唔到，荞麦因为粗生，所以成为当地人仅能种植嘅食粮。荞麦喺日本，好早就出现，绳文晚期出土嘅陶器中就发现咗荞麦，证明三千年前荞麦就已经喺日本生根，比稻米仲要早出现。荞麦喺日本，多数系喺苦寒地区落地生根，长野，山梨、信州、新潟等地都系荞麦产区，自古就有食用荞麦嘅习惯。
灰灰暗暗嘅荞麦面，曾经俾武士同贵族睇唔起。
有女唔嫁俾佢
呢啲地区，冬日成日落暴雪，稻米、小麦都种唔成，人民生活困苦，只可以种植荞麦度过苦日子。好在荞麦生长速度超快，所以即使遇上饥荒，都可以成为救灾食物。公元722年就有文献纪录，建议以荞麦作为救荒农作物；《续日本纪》中也提到：「今夏无雨苗稼不登，宜令天下国司劝课百姓，种树晚禾荞麦及大小麦，藏置储积，以备年荒。」亦因为咁，荞麦喺日本人心目中，一直系穷人食物嘅代表。
江户时代，较富裕嘅日本人都睇唔起食荞麦嘅人，好多人甚至唔俾女儿下嫁食荞麦嘅人家，简直系歧视。当时嘅武士同贵族，觉得洁白嘅大米先系身份象征，荞麦颜色灰灰暗暗的，一啲尊贵感都冇，宁愿死都唔愿意食。当时只有一啲廉价旅馆，会提供荞麦面俾投宿客人，荞麦面于是成为平价旅馆嘅食物代表。今日东京好多荞麦面店，门口经常出现「薮」或者「砂场」呢啲名，指嘅就系种植荞麦嘅荒芜土地。
荞麦面配天妇罗，系好多人心目中嘅至爱。
江户四大美食
咁贱嘅食物，点解会摇身一变，成为「江户四大美食」之一？呢个同德川家康定都江户大有关系。十七世纪，德川家康选定隅田川口小村庄作为日本新政治中心，诸侯、大名、武士纷纷进驻；呢啲特权阶级，主要食农民上缴嘅白米做饭，但低级一啲嘅工匠、渔民同农民，就冇钱买白米，于是改食用荞麦制成嘅食物。最初荞麦并唔系用嚟做面，而系制成糕饼，先煮后蒸，放喺装咗热水嘅桶上面食，称为「蒸し荞麦」。
江户中期后，荞麦至开始做成面条，当时，一位由朝鲜到日本嘅僧人元珍，发觉荞麦面唔够小麦做嘅面条咁韧，就加入少少小麦粉嚟做，由于口感好，受到江户人欢迎，成了广为流传嘅「茹で荞麦」，令到荞麦面更普及。后来更演变出将煮好荞麦面冷却放喺竹筛上食，称为「盛放荞麦」，因为凉爽好食，令到荞麦面更加走红。
十八世纪中叶，荞麦面更加多咗配菜，鸡蛋、鳗鱼、天妇罗都可以，愈食愈丰富。十九世纪中叶，江户已有超过七百间荞麦面专门店，连屋台立食都有，证明人气度十足。不单人气，荞麦面更加跃升为江户四大美食之一，同鳗鱼、寿司、天妇罗齐名。至此，我谂连荞麦面自己，都唔记得佢以前系个穷到㶶嘅家伙，曾经俾人劲睇唔起呀！
