【饮食】震惊！刺身非日本人发明？苏轼食到有眼疾？曹植 李白 杜甫都系粉丝
今晚食乜嘢？不如食日本嘢啦。好呀！我最钟意食日本刺身，三文鱼、吞拿鱼、油甘鱼……仲有海胆、甜虾、帆立贝，统统我都要食。得得得，冇问题，不过企定先，听清楚，以下介绍嘅刺身起源故事，听完我惊你会崩溃呀！
日本刺身，矜贵又好食，系香港人嘅头号至爱。
刺身其实点解？
刺身，日本语系さしみ，音读出嚟系Sashimi，呢个人人都识啦。刺身其实系日本人对切片生肉嘅称呼，唔单止系鱼肉，牛肉、马肉都可以做刺身。刺身一词，其实始于日本室町时代，「刺」嘅意思系切成薄片，「身」嘅意思就系「肉」，所以刺身就系切成薄片嘅肉。不过亦有人讲，「刺身」其实系一种识别方法，因为日本人㓥鱼去皮后，难以辨别系乜嘢鱼，所以用竹签将细细块鱼皮刺喺鱼片上以资识别，呢种方法称为「刺身」。亦有一种讲法，系刺身其实系日语「刀」（Tachimi）嘅转音，因为切鱼讲究刀章，所以用上乘刀工切出嚟嘅鱼生就叫做刺身。
刀章高与低，直接影响刺身的质素。
周朝已经出现鱼生
无论起源系乜，日本人的确将刺身做到出神入化，兼且发扬光大，甚至变成国食。但系劲还劲，讲到历史源流，原来鱼生呢味嘢，又系嚟自我哋伟大嘅中国。系呀！中国人，一早就食鱼生。鱼生，我哋称为「脍」，又作「鲙」。脍字最初嘅意思，系指切细嘅生肉。《汉书·东方朔传》就有记载：「生肉为脍。」《礼记·内则》都有写：「肉腥细者为脍。」咁到底中国人几时开始食脍？原来最早可以追溯到周朝，产于周宣王五年嘅出土青铜器「兮甲盘」就有铭文记载，当年周师于彭衙迎击猃狁打胜仗，大将尹吉甫私宴张仲及其他友人，主菜就系烧水鱼加生鲤鱼片。《诗经·小雅·六月》都记载咗呢件事：「饮御诸友，炰鳖脍鲤」，「脍鲤」就系生鲤鱼生啰。后来孔子成日讲嘅：「脍炙人口」、「脍不厌细」，个脍字就系指鱼生。
薄切嘅鱼生，品尝到鱼嘅鲜美，系最上等嘅料理。
曹植李白杜甫都食
不过古代中国人食鱼生，同现代日本人唔同。中国人爱以淡水鱼做鱼生。鲈鱼、鲫鱼、鲤鱼呢啲都系上品。七步成诗嘅曹植，就系鱼生粉丝。佢喺《名都篇》入面话：「脍鲤臇胎虾」，即系话食鲤鱼鱼生要蘸小虾酱先至正！真系奄尖。食鱼生嘅风气，一直去到唐代，仍然处于高峰。诗仙李白，就多次喺诗中提及食鱼生嘅奥妙：「双鳃呀呷鳍鬣张，𫏆剌银盘欲飞去。呼儿拂几霜刃挥，红肌花落白雪霏。为君下箸一餐饱，醉著金鞍上马归。」佢嘅同行诗圣杜甫都唔执输，都写咗：「鲜鲫银丝脍，相芹碧涧羹」嚟咏叹自己食鲫鱼鱼生嘅乐趣。其他好似白居易、司马光、欧阳修呢啲大文豪，个个都有为鱼生赋诗，可见都系粉丝一班。
大文豪苏轼，系鱼生头号粉丝，食到眼盲都要食。
苏轼系超级粉丝
不过讲到头号粉丝，各大文豪都比唔上宋朝苏东坡。佢系吃货人人皆知，不过佢系鱼生超级头号大粉丝，大家就未必知道。苏东坡写过关于鱼生嘅诗词，现存有十三首，好似《将之湖州戏赠莘老》中，就有一句：「吴儿脍缕薄欲飞」，就系指湖州嘅鱼生切得够薄够靓。不过，苏东坡食嘅系淡水鱼，而淡水鱼其实好多寄生虫，生食系非常危险，奈何当时嘅医学水平，并未发展到显微镜呢样嘢，喺唔知情嘅情况下，苏东坡因为狂食鱼生食到患上眼疾。本来呢个病，系唔可以再食鱼生嘅，但身为吃货嘅苏轼，又点会咁易妥协？佢仲写文话：「余患赤目，或言不可食脍。余欲听之，而口不可，曰：『我与子为口，彼与子为眼，彼何厚，我何薄？以彼患而废我食，不可。』，意思即系：「食鱼生对唔住我对眼，但唔食鱼生又对唔住我个嘴，咁我点可以厚此薄彼呢？」你话一个人为食到咁，真系有乜解究呢。不过大家唔使惊，而家日本人食嘅鱼生，大部分都系海鱼，绝少用淡水鱼，而且超级讲究卫生，食鱼生不单唔使再担心食到眼盲，仲系一种高级贵价享受。先生小姐，今晚食乜嘢？不如食刺身吖！
