【饮食】爵士汤源于边位爵士？起源竟然同报恩有关？
爱好饮食嘅香港人，都会听过呢个名。爵士汤，以蜜瓜、响螺头、老鸡、鸡脚、花胶、沙参、玉竹等材料，煲足三小时，响螺鲜美、花胶软滑、瓜肉清甜，是满满骨胶源嘅滋补靓汤。
明阁嘅爵士汤，用咗哈密瓜嚟煲，汤头滋润清甜。
源于邵逸夫？
呢道爵士汤，今日各大酒家都会制作。像旺角康得思酒店星级中菜厅明阁，就提供呢款靓靓爵士汤，一样落足花胶、响螺头嚟煲，仲落埋哈密瓜，饮起嚟超级滋润，味道十分香甜。其实呢个汤，叫得呢个名，估都估到一定同某位爵士有关啦。咁你又知唔知道呢款汤到底系边一位爵士嘅爱汤呢？尽管爵士汤流行至今不过四五十年，但坊间流传嘅起源，都有最少三个版本。第一个版本，系话爵士汤，其实系源于邵逸夫爵士。呢个讲法，系嚟自一啲邵氏资深员工，佢哋透露，邵爵士能够享寿107岁，其中一个秘诀，就系日日饮靓汤。佢用海螺头、唐排、老鸡、猪腿肉、瑶柱、淮山、南杏等材料，唔落花胶落牛筋，唔用蜜瓜用哈密瓜，熬足六个钟，唔要汤渣，净系饮汤。肉味鲜甜，超级滋补，后来坊间就叫呢款螺头哈密瓜牛筋汤做爵士汤。
邵逸夫爵士享寿107岁，闻说长命秘诀之一就系饮汤。
邓肇坚爱汤？
不过呢个讲法，当然有人异议，坊间流传最广嘅说法，系爵士汤源于另一位爵士：邓肇坚爵士。佢系上世纪香港企业家及慈善家，以生活俭朴、热心公益及慷慨捐款著称，好多学校、医院、建筑物都用佢个名嚟命名。咁个汤同佢点解会有关系？
据说上世纪八十年代，邓肇坚爵士经常到上环西苑酒家帮衬，佢钟意饮自己材料煲嘅汤，就命人提前送煲汤材料去酒家，响螺、老鸡、鸡脚、花胶、沙参、玉竹……仲落埋蜜瓜，叫西苑大厨代熬。熬足几个钟，到佢夜晚嚟到饮，汤甜清润，滋阴补气，个个都赞邓爵士识食又识补。由于呢个系邓爵士私房汤，老板征得爵士同意，将呢个汤放上菜单，并命名为爵士汤，以记念系邓爵士所创所爱，后来客人饮过，口碑传千里，成为城中名汤。
西苑酒家版本嘅爵士汤，系用蜜瓜嚟煲，较哈密瓜清新。
记念救人命？
爵士汤因邓肇坚爵士而起，原来坊间仲有一个版本。话说曾为富豪郑裕彤开设嘅富万年酒楼做总厨嘅黎汝森，先后招呼过不少名人。佢话1979年佢喺澳门赛马车协会工作嘅时候，邓肇坚爵士就经常嚟食饭。话说有次，黎汝森有个伙计身体唔舒服，邓肇坚见状，认为事态不妙，即时打电话命人用车将伙计送到邓肇坚医院检查，最后诊断伙计患上肺结核，幸好及时发现，最终救回伙计一命。黎汝森为答谢邓肇坚爵士，知道爵士钟意饮汤，就用响螺、肉排、哈密瓜、圆肉、红枣、陈皮等煲汤，煲足三个钟头。汤味鲜美、瓜甜螺香、药味浓甜，由于材料都煲到透，连邓爵士本来牙齿欠佳，都可以食到汤渣，深得爵士喜爱。呢个汤，最后就称为爵士汤，除咗爵士爱饮，亦记念佢救咗个伙计一命嘅事迹。至于三个版本，你信边个，就只好由你话事，我负责讲故仔同饮汤嘅啫。
邓肇坚爵士宅心仁厚，系上世纪大慈善家。
