【饮食】南洋之宝｜叻沙叻在够复杂 名称来自梵文十万嘅意思
咖喱、辣椒、姜花、南姜、香茅、红葱头、辣椒、虾膏、洋葱、叻沙叶、巴拉盏、罗望子、亚参果、椰奶……一连串长长嘅香料配料名称，其实只系组成叻沙汤底嘅冰山一角。叻沙，呢种星马国食，无论香料、配料、味道、风格，各处地方各处味，简直可以用变化莫测嚟形容。
红红黄黄橙橙嘅叻沙，睇到就已经猛吞口水。
十万种香料？
唔同嘅香料组合，变化成唔同味道嘅汤底。唔同嘅地方，又混调出唔同嘅口味，做成谜一样嘅世界。咖喱叻沙、亚参叻沙、古晋叻沙、吉打叻沙、江沙叻沙、怡保叻沙、玻璃市叻沙、吉兰丹叻沙、登嘉楼叻沙、柔佛叻沙……品种多不胜数，你听过未听过都有。咁又唔使奇怪，叻沙系个大世界，复杂就系佢原来嘅初心。
叻沙，又叫喇沙，马来语名Laksa，这词源于古印度梵文的 Laksha，是数量非常多的意思，其中Lakh就有十万的意思，哗！你话几浩瀚。早期东南亚一带，深受古印度文化的影响，中南半岛西部沿海至马来群岛一带，当地嘅饮食文化词汇中，都可以发现Laksa呢个词，或由呢个词所延伸而出嘅名称。
东马来西亚嘅阿庇市，满街都可以食到地道叻沙。
来自南洋娘惹？
不过词虽嚟自印度，但系喺印度嘅饮食文化中，却没有出现Laksa一词，甚至类似食物组合都从未出现过，估计系当时生活喺沿海或河边嘅马来人或其他东南亚民族，独自发展出混合各种香料、鱼类和面条嘅料理，因为多种食材汇聚，唔同味道交织融合，因此借用梵文中嘅Laksha一词，嚟表达超级无敌多嘅意思。
叻沙起源于南洋，发展到今日，已经成为马来西亚及新加坡嘅美食代表。尽管真正起源已经是个谜，但有人流传，佢系嚟自南洋嘅娘惹料理。娘惹（Nyonya）系指15世纪初期到17世纪之间，定居在马六甲、印尼、新加坡、泰国和缅甸嘅华人同马来人通婚生下嘅混血女性后裔。因为娘惹料理通常系家传，各家各户做法各有不同，口味就随着唔同地域发展，变化出唔同地方嘅特色。
砂拉越叻沙嘅汤头用咗马拉盏，同椰浆而成，红卜卜，香辣浓郁。
四大类型你要识
简单分类，可以分出四大类型：咖喱叻沙（Curry Laksa）、亚参叻沙（Asam Laksa）、东海岸叻沙（Pantai Timur Laksa）和砂拉越叻沙（Sarawak Laksa）。
咖喱叻沙：使用咖喱椰奶汤头，多搭配米粉同油面，新加坡最流行就系呢种；
亚参叻沙：是用鱼汤，味道又酸又辣，食落有鱼茸喺入面，所以有少少腥鲜，以槟城最具代表性；
东海岸叻沙：最大特色系用鱼汤加上椰浆做汤，汤头呈奶白色，较为浓稠，吉兰丹、登加楼就系以此驰名；
砂拉越叻沙：汤头用咗巴拉盏（或称马拉盏，Balacan）混合椰浆而成，香辣浓郁，汤头颜色十足红咖喱，但就冇印度咖喱香料嘅成分，好吊诡。
单单睇见上面四类嘅分别，系咪已经头都痛埋？其实使乜理咁多，黑猫白猫，捉到老鼠就系好猫。叻沙，好食就得啦！
香港本地都有马来叻沙出品，即食汤底，非常方便。
