【生活】英国版10蚊店Poundland 必买攻略+必逛Superstore
去亲日韩，当地10蚊店真系可以逛完再逛，香港10蚊店都唔错，有好多实用小物，来到英国，呢边都有10蚊店 Poundland (同埋拆伙出来的 OneBelow)，分店多如超市，虽然无香港日韩十蚊店咁多精致小品，但入去兜一转仲有收获。
叫得做Poundland，基本上货品价钱大部分定价在1镑，当然如香港般，亦有部分货品定价1镑以上，种类既有家居小摆设、咕𠱸、玩具、图书、文具、DIY 手作，亦有衫裤鞋袜，但我觉得最抵买的是一系列成药、清洁用品、厨房用品同手机用品。一般必理痛、感冒热饮、消炎药、喉糖、鼻塞伤风药，甚至维他命C都只售 1 镑，贵药基本上也不多于5镑，当然要讲到专，买药还是要去药房。
清洁用品亦是我必入之选，呢只只卖 1 镑的 The PINK stuff 有一系列清洁用品，特别针对顽固污渍，真系好正。冲凉企缸用耐咗，常生橙色的锈渍 (应该是同英国水质有关)，我会用来清洁，对付磁砖边亦一流。家中常备的洁厕用品、漂白水亦卖得便宜。
行香港十蚊店，厨房小gadget可以买唔停，呢边花款唔算多，亦无日本人咁多聪明设计，但大部分都针对本地人需要而推出，好似 toaster bag，方便你搽晒酱或者整芝士多士都唔怕整污糟toaster，最正系每个可以用上50次，够晒环保。Slow cooker liner、roasting bag都系方便你煮食时唔会整到好messy，方便清洗。隔热板、隔热手套、整蛋糕的焗盘小gadget、瓦盘，全部都是价廉物美之选。
来英前特登买咗好多电话贴同叉电线，因为担心呢边贵，点知俾我在 Poundland 见到 1 镑「三叔」、iphone XS 等电话贴 (不过就无最新款)，加埋长叉线短叉线都系 1 镑，梗系要买定长备家中。
不过讲到好行，必推位于不同 Retail Park 内的 Poundland superstore，size 系市中心的一倍，货品款式更多，除了同样有服装部，亦有更多园艺用品、电子用品、大型卡通、电影衍生的玩具 (Harry Potter、Toy Story、Peppa Pig)，天气开始回暖，已见有充气小水池上场，当然价钱就不是 1 镑了。这些 Superstore 胜在货品种类更多，一家前来既买日用品，亦入手玩具 gadget，细路开心，大人荷包都唔会太伤。
