Wonka Bar、果汁糖 spray、青柠批 Kit Kat！伦敦美式糖果店热潮
4 月除了是复活节，仲系年中 term break，学生连埋复活节假，有近 3 星期假期，唔少人都会乘机去英国其他城市玩下，而我哋都快闪 3 日 2 夜南下伦敦玩番转。由诺定咸去伦敦，其实都好方便，除了可以搭火车，其实搭 Coach 都抵又舒服，6 镑一程，几个钟就到伦敦市中心，仲有几个落车点可以选择。今次除了去大英、唔同博物馆，行街街都系主要项目。大乡里出城，估唔到伦敦有咁多美式糖果店！每间都入去逛逛，sweet tooth 表示好开心。
曾几何时，香港都有糖果店主打美式糖果朱古力，可惜只得一两间，热潮 hit 唔起。不过来到伦敦，这股美式糖果风潮却唔止 hit 得起，仲产生连锁效应，单是一条 Oxford Street 及周边，便有近 10 间美式糖果店，非常夸张。行过好几间，心水系呢间 AMERICAN CANDY，成间店色彩缤纷，无论大人细路入到去都会好开心，因为朱古力糖果薯片款式多又特别。糖果朱古力品牌如 Hershey’s、Reeses、M&M’s、Snickers、Mars、Skittles、Oreos、KitKat、Nutella……唔少都是香港人熟悉的品牌，不过口味款式却有新意，好似 KitKat 的水果 cereal 味、青柠批味、M&M’s 的 Brownie 味、Coffee nuts 印象中在香港无见过，仲有 Mars 朱古力饼、朱古力酱、baking 材料等食品，朱古力迷肯定买到唔停得手。
小朋友有睇过英国作家 Roald Dahl 的《Charlie and the Chocolate Factory》﹙电影《朱古力掌门人》﹚见到一排排的 Wonka Bar 份外兴奋，每排朱古力都附上 Golden Ticket，虽然无得去 chocolate factory，都可以留个纪念。店内仲有一枝枝 candy spray，喷入口系果汁糖味，喷咗当食咗。朋友女儿大力推介一款 cereal，一盒早餐脆脆之外，仲夹杂唔同口味棉花糖，仲话系鬼妹同学最钟意呢款。不过价钱唔平，一盒要近 10 镑，即系近 100 蚊港元一盒！
