英式美食｜移英朋友注意，炸鱼薯条原来唔系嚟自英国
随着愈来愈多人移民英国，社交媒体就经常出现呢样嘢。
Fish & Chips，炸鱼薯条，个个去英国嘅人都一定会食，兼且一定会贴出嚟，以示自己真系去咗英国。只不过，呢款全世界公认，俨如代表英国嘅英国国食，真正嘅起源，原来唔系UK，而系大西洋彼岸另一个国家，真系要搞清楚呀。
金黄炸浆，包住白雪雪嘅鱼柳，配热辣辣薯条，就系英国国食喇。
炸浆要落黑啤
搞清楚之前，先开始做炸鱼薯条。识食嘅人都知，炸鱼薯条最重要，唔系鱼同薯条，而系用嚟炸鱼嘅炸浆。要做出又松又脆嘅炸浆，材料一定要落足。嗱！开始嘞。面粉混和自发面粉，落少少盐，打个蛋黄落去，加牛奶或者黑啤，少少油、适量水，咁就可以开始打浆。打打打，打到佢杰身，好似奶油面糊咁。呢个时候，将两个蛋白打至起泡，加埋入奶油面糊度，静置半句钟，呢部分暂时搞掂，跟手可以整鱼。一般炸鱼薯条，都会用鳕鱼，超市好多雪藏鳕鱼柳，买返嚟就用得。解冻，两面扑粉，放入面糊里面，全条都要蘸匀。烧一锅油，摄氏180度左右。将蘸满面糊嘅鱼柳轻轻放入滚油中，炸到鱼块浮面就翻身，再炸到两面金黄即可。薯条呢，一系自己切薯仔，一系买冰鲜货，放入油镬炸起就得，超易。最后配酱料，英国人会配盐、麦醋、豌豆泥，美国人、加拿大人同澳洲人，钟意配茄汁同他他酱，但无论配乜嘢酱都好，一角柠檬系唔少得，食时唧落去，消热气又清新。
伦敦Camden Town嘅炸鱼薯条，炸浆明显深色，系重口味黑啤嘅功劳。
源自西班牙炸鱼
好嘞！炸鱼薯条搞掂，故事亦要开始讲。
话说炸鱼薯条早喺1860年就喺伦敦东区街头出现，由一个犹太裔男孩约瑟夫‧马林（Joseph Malin）发明，鱼柳用薄浆包住炸好，加埋热辣辣薯条用报纸包住周街食，系百分百街头食物。因为太受欢迎，后来入舖，再发展到周边地区。曼彻斯特的东北嘅奥咸（Oldham）嘅汤米菲尔德市场，就有一个蓝色牌匾，标示该地是1860年代炸鱼薯条店及快餐业起源。犹太裔男孩之所以会做呢种食物，同佢嘅祖先流徙有关。话说公元8世纪到12世纪，好多犹太人为逃避西班牙宗教裁判所审判，由西班牙避居于葡萄牙，本来生活平静，宗教自由，直到1496年，葡萄牙国王曼纽一世娶咗西班牙嘅伊莎贝尔做皇后，恶梦就开始。伊莎贝尔唔信犹太教，亦唔钟意犹太人，大肆驱赶佢哋，大量犹太人于是逃离葡萄牙，越过大西洋到英国定居。由于佢哋嘅祖先，早喺西班牙时代已经学识一种叫Peshkado frito嘅炸鱼技巧，就连呢种技巧一齐带到英国去。
加拿大渔夫，会用大西洋钓回来的鳕鱼做炸鱼薯条，十分新鲜。
变成全球美食
呢种炸鱼，跟住犹太人飘洋过海嚟到英国，本来只系犹太人安息日嘅食物。估唔到由一个细路引爆，一跃成为风靡全英嘅美食。由伦敦东区街头，到曼彻斯特的东北嘅奥咸，逐渐扩展到英伦三岛各地。1910年，全英已经有超过25,000家炸鱼薯条店，十年后更急升至超过35,000间，之后更出现炸鱼薯条嘅大型连锁店，星星之火，已经燎原。
其中最有名的炸鱼薯条大型连锁店Harry Ramsden，喺1952年就创出一日之内卖出10,000份炸鱼薯条嘅健力氏世界纪录，真系威过威士忌。更威嘅系，炸鱼薯条热潮，更扩散到美国、加拿大、澳洲、新西兰等国家，并且大受欢迎，人人都盛赞呢种英国传来的美食为英国国食，一直至今，深信不移。移民英国嘅朋友仔，以后有人问你关于炸鱼薯条嘅嘢，你就背咗上面𠮶段发展史俾佢听，分分钟好味过佢手上𠮶块炸鱼薯条架！
Fish & Chips的店舖，不单偏布全英国，甚至世界各地都有，已成国际美食。
