最营甜品｜喳咋唔同摩摩喳喳？原来系葡兵军粮？点解又叫阿婆粥？
有一种糖水，被称为最有营养糖水。
因为佢嘅材料，以豆为主。一大把豆，倒晒落去煲。
红豆、绿豆、腰豆，鹰嘴豆，眉豆，赤小豆，扁豆……通常四五款左右，家家都有自己配方。再加芋头、西米、黑糯米等等，落糖煲到杰挞挞，舀起落花奶落椰浆，就系坊间最有营养嘅甜品嘞。因为豆类除了含有丰富蛋白质，仲有高水溶性纤维，有助降低胆固醇，平衡血糖，保持肠道健康。呢款甜品，大名：喳咋。个名咁怪嘅？查实佢系鬼佬嘢啰。
豆呀！全部都系豆呀！喳咋就系全部都系豆啰。
庙街食喳咋
香港地，人人都食过喳咋啦。老一軰嘅人，都会记得呢一幕。入夜，约三五知己，去佐敦睇戏。睇完戏，行庙街，即系平民大笪地。由庙街南逛到庙街北，有人卖艺、有人卖药、有人卖衫，睇饱逛完，意犹未尽，最后嘅节目，就系食糖水。食乜好？一场嚟到庙街，梗系食喳咋啦。当年庙街，所谓有「一鸡一鵞」，雄霸街头街尾。鸡，即系鸡记麻雀。原是一间士多，后靠出租麻雀赚钱，最后妺仔大过主人婆，索性全力攻打四方城，成为全港首间持有牌照的麻雀馆，十分巴闭。鵞呢，咪系鵞记渣咋啰。鵞字由「我鸟」打栋写，十分有个性。伯爷𠮶代就由澳门做起，嚟到香江，开枝散叶，最初只系卖喳咋糖水嘅木头车档，常在鸡记门口摆卖，辗转入舖，愈做愈大，至今宝号已近百年，传至第三代。喳咋好足料，有红豆、绿豆、红腰豆、木薯、黄薯及西米，最后加椰浆同花奶，稠杰饱肚，据说系澳门传统做法。
澳门泉记喳咋，历史悠久，几代人都系食佢架。（网上图片）
源于葡国兵
喳咋唔系本地嘢，呢个肯定。
旧时过大海，已经见到周街都卖喳咋。好似澳门新桥，即系三盏灯、白鸽巢，就有喳咋泉主理嘅泉记喳咋，大大话话有六七十年历史。其实喳咋真系源起于澳门，因为喳咋呢个名，本来叫「杂杂」，传说系葡萄牙语「杂粮」的音译。葡人的杂粮，据说系嚟自以前驻守喺澳门兵房嘅葡国士兵，佢哋将各式各样嘅豆煮成一大煲糖水做午餐，食完可以饱肚。后来呢种午餐，流传到军营以外，有阿婆照办煮碗，煮一大煲踎喺街边摆卖，所以喳咋又叫阿婆粥。
之后慢慢演变，又加芋头又加西米又加黑糯米，又落埋椰浆同淡奶，从此更成为澳门人所共知嘅糖水。可能由于又落豆又落椰浆，个名又好鬼似，好多人慢慢将佢同马来西亚嘅甜品「摩摩喳喳」捞乱。摩摩喳喳（Bubur Chacha），主要系用亚达枳、西米、粟米等做材料，加入芋头、番薯、红毛丹、龙宫果、波罗蜜等南洋水果，最后加椰浆及花奶而成，可以热食，亦可以加冰冻食，同喳咋系两回事，其实冇亲戚关系架。
超市都可以买到即食版，喳咋已经深入民心了。
