【旅游】韩国｜最爱济州岛与大邱
韩国系小编非常喜爱嘅地方，记得第一次去济州岛同大邱，感觉真系非常舒服，自然清新人亦有礼。如果大家去韩国系跟旅行团，可能好多时都会遇到一啲香港导游 (即系香港人啦)。小编亦都唔例外，遇到一个由香港去到韩国居住嘅导游，感觉非常亲切 (因为大家都系讲广东话嘛)。
年轻导游由香港去到韩国之后，娶咗一个韩国女仔，原来佢话韩国嘅传统系女人嫁男人时会将所有身家交晒比个男人，之后就由男人养个女人一世。不过喺依家呢个男女平等、财政独立嘅年代，呢啲传统应该都开始消失。
日出峰系济州岛出名嘅名胜，地方大空气好，一大片嘅草地，而上到山顶仲有一望无际嘅海景，𠮶种轻松同心旷神怡嘅感觉真系好难形容，一定要亲身去感受下先会明白当中嘅美好。假如旅伴中有长者亦都可以喺山脚坐一坐饮吓水，欣赏下周围景色。
大家又知唔知道，原来日出峰系刚入伍「新兵」经常去训练体能嘅地方呢？ 小编就试过同「新兵」并肩一齐行上山顶。
喺济州岛周围都会见到当地嘅土地公，外型都几可爱㗎。对于济州土地公有好多嘅传闻，但小编就无理太多，只相信系守护神啰，所以都带咗一对土地公同土地婆返嚟香港，更随身带住一个土地公喺身边，不过佢已经甩晒色咯，依家变咗好似「差利」，唔知大家又觉唔觉呢？
因为系沿海地区关系，喺济州岛同大邱可以尝尽新鲜海产，以前仲可以去睇「海女」表演，不过由于商业经济嘅发展，年轻一辈都已经无人再做「海女」，所以基本上都已经好难再睇呢类表演喇。而小编最有印象嘅新鲜海产可以话系八爪鱼刺身，睇住啲八爪鱼被切后仲郁下郁下，当你想食佢嘅时候佢仲会继续吸住你个咀同条脷，真系非常艰难先至食到一条触须㗎。
#韩国 #济州岛 #大邱 #土地公 #守护神 #八爪鱼 #海女 #入伍新兵 #日出峰#South Korea #Jeju Island #Daegu #Groundskeeper God #octopus #Haenyeo #Seongsan Ilchulbong
