曾经是旅游胜地的芭提雅
泰国呢啲旅游热点又何止去一次吖，第一次感受完旧式旅行团，相隔几年后小编又再一次去泰国玩。由于当地旅游业已经开发咗一段时间，所以选择亦都多咗，除咗有传统嘅〝购物团〞之外，亦开始多咗玩乐性质嘅景点。𠮶次小编就选择咗去港人同外国人都好热爱嘅芭提雅 (至少当年系)。芭提雅比小编嘅感觉唔错，天气好景色好，简单宁静又唔算多人 ，唯一嘅一样嘢系唔敢喺街买嘢食 (见到用胶袋嚟装饮品食物感觉……)。
而当年𠮶啲咩布吉岛、PP岛、苏梅岛、象岛、沙美岛等等全部都未加入旅游行列，可以话芭提雅系当时阳光与海滩嘅唯一选择。当年去得芭提雅必玩嘅降落伞、玻璃船、水上电单车小编都玩过哂 (可能系被玩)，而且仲有非常深刻嘅回忆添。玩降落伞之前要先坐〝大飞〞出海去海中心个〝浮台〞(其实应该系话大船先啱)，想当年少不更事，一上〝大飞〞就即刻走去船头坐，拧转头见到个船家望住我，但我无理佢，照样霸住船头个位，点知……一开船就知出事，架〝大飞〞真系一路咁飞 (直情系成个船头离开水面𠮶种)，仲要上上落落咁〝扽〞，成个人都差啲被抛起，小编当时唯一可以做嘅就系双手用力捉紧条栏 (真系非常high high + 魂魄唔齐)，飞咗好一阵子终于都停落黎，一回魂之后只系觉得一对手踭好鬼痛，而且重瘀哂……。上到浮台只系闻到好大阵电油味，跟住大队著救生衣，比人拉上天再落返黎，整个过程都系迷迷糊糊……。
玩完降落伞之后就去咗坐〝玻璃船〞睇珊瑚，𠮶只〝玻璃船〞，小编感觉佢实情就系一只〝舢舨〞，开头以为只系接驳船，点知坐咗上去之后，个船夫突然抽起船底块木板然后用手指一指，我哋就向下望……原来所指嘅珊瑚礁就喺船底，小编眼力唔好睇唔到啲乜，大家又睇唔睇到呢？
最后，去玩水上电单车，由于小编一向都忌水，但无理由掉低个旅伴自己一个人玩㗎，咁就唯有硬住头皮坐车尾，旅伴揸住架水上电单车向海中央出发，小编都觉得无乜问题，突然去到海中央架车停咗喺度，小编真系惊到完全〝硬哂呔〞连嘢都讲唔到……，依家谂番都重有啲阴影。
#泰国 #芭提雅 #旅游分享 #旅游体验 #阳光与海滩 #降落伞 #玻璃船 #珊瑚礁 #水上电单车 #美好回忆 #快艇 #Thailand #Pattaya #travelsharing #travelexperience #sun and beach #parachute #glassboat #coralreef #waterbike #goodmemories #speedboat
