KellyChu - 创办「爱望基金」 营运3年 郑志刚挽救近200精神困扰家庭 | Executive日记
好多人都无为意，有一个非牟利机构「WEMP」（即Wellbeing幸福感、EQ情商、Mental Health精神健康、Parenting家庭教育），中文叫「爱望基金」，由一批商界精英、学者、社工、心理学家、教育界等人士组成，过去3年来协助近200个受精神困扰儿童同佢哋嘅家人，走出阴霾，甚至消除自毁嘅念头。呢项义务工作，发起人就系郑志刚（Adrian）。
「爱望基金」网站开宗明义引述Adrian嘅主张︰「今天的孩子就是未来的领袖。精神健康对所有孩子都十分重要，我们应克尽己任去培育他们，让他们在身心健康的环境下成长，共同创造充满爱与希望的环境。」而同Adrian熟识嘅朋友，都会听过佢一个比喻︰儿童与生俱来，心理唔会有问题，都系长大过程中环境所做成，甚至系来自父母，儿童心中有一个窿，会伴随一生。
「爱望基金」首席执行官毛迪生同传媒讲，佢哋透过社工、心理学家嘅深度介入，过去3年帮助近200个受精神困扰儿童同佢哋嘅家庭，其中一个极端个案，系通关后，一家之主嘅父亲失业、太太抑郁、子女精神受困扰，成家人挨饿，并有自杀嘅倾向，曾向医管局和其他志愿机构求助，但申请等候仲要以月计。「爱望基金」立刻行动，先捐款解决呢家人嘅温饱，并提供精神辅导，将呢家人由自杀边缘拉回来。
根据Adrian嘅想法，「爱望基金」不单止要喺基层家庭、幼稚园中小学等层面提供精神健康教育和辅导，还要联同海外高等学府研究方法，纾解儿童嘅精神健康问题，甚至发展至成为一个国际性嘅服务提供者。
Adrian一向低调，上周以香港财富传承学院董事会主席身份，喺被喻为「币圈盛事」嘅「Consensus」大会上发言，讲加密货币和数码资产嘅趋势，被商界议论佢喺离开新世界主要职务之后，或会再度活跃，但其实非也。知情人士指，Adrian觉得自己一公开露面就「好惹火」，即使听从公关朋友系时候讲下「爱望基金」，等多啲人关注儿童嘅精神健康，也交俾「爱望基金」嘅行政人员讲，自己一于唔出面咁话。
KellyChu
