Jacky哥 - 煤气公司都有研发部，其实有咩做？ | 企业热话
企业如果想持续发展，创新研发必不可少！最近听煤气公司总经理──住宅产品及品质监控李浩良（Ivan）分享，知道煤气公司总部有个展馆，展出员工发明嘅设备，而公司仲有个研发部。原来唔少人用紧嘅煤气智慧炉具，都系Ivan同佢同事嘅心血结晶。
喺煤气公司工作超过30年嘅Ivan，曾经喺负责定期安全检查计划嘅部门做嘢。佢话，1995年煤气公司想帮每家每户做安检，但当时喺香港冇其他燃气公司嘅定期安检先例可以参考。𠮶阵政府订咗每三年（即36个月）为用户换一次煤气胶喉，以防喉管老化漏煤气；而煤气公司嘅先导计划就发现成功入屋检查比率大约50%。Ivan因为呢两个数，得出36除以2，即系每18个月上门为用户做安检，后来政府都向气体装置用户提出相关安检建议。
研发产品方便用户、保障安全
Ivan话，呢个经历同煤气公司研发部一样，经常要喺无先例可循下，谂谂有咩方法令产品更安全、环保。以煤气表为例，2002年后落成嘅楼，煤气管道舖晒讯号线连接煤气表，煤气公司可以遥距读取度数；针对未有讯号线嘅旧楼，Ivan嘅部门就研发「智能报表系统」，将智能读表器加喺旧款煤气表，住户用手机程式或WiFi就读到度数，尤其方便老人家唔驶擒高擒低读表。
佢仲话，因为新表读数可以随时传返公司，煤气同事就研究点样透过数据去侦测一啲问题，加强保障家居安全。于是，佢哋设计咗有内置阀门嘅智能表，当侦测到住宅用户用气量突然𩙪升并超过正常水平、煤气表24小时都检测到用气，或用户长期未做安检，智能表会闩咗阀门暂停供气，继而煤气公司收到通知并派员上门检查，确保安全就恢复供气。
十年磨一剑 全靠部门夙夜匪懈
咁研发部系咪要定期「交货」呢？Ivan话，佢哋部门同事喺办公室一日半日冇咩成果影响唔大，但半年无产出就唔得啦！所以佢成日鼓励同事多啲谂新嘢同点样完善每个细节，袋定啲桥，有机会就向同事同管理层介绍！佢话一般嚟讲，同事嘅创新概念经过测试、认证、生产，要一年至18个月先可以成为产品推出市场。
Jacky哥
