KellyChu - 港铁靓女AI大使鲗鱼涌站解疑难 | Executive日记
KellyChu
2024-02-28 02:00 HKT
字体大小
港铁今年踏入45周年，主席欧阳伯权预告嚟紧将会有好多节目推出，今年亦都会善用科技服务市民，其中喺鲗鱼涌站设立咗AI车站服务员，为乘客解答各类问题，完成试验后有望喺更多车站投入服务。
鲗鱼涌站嘅AI车站服务员系一位靓女姐姐（见图），乘客喺萤幕上点击对话便可向佢提问，佢会为你解答站内设施位置等问题，例如银行柜员提款机、洗手间及手机充电设施系边，又可以要求真人提供协助。港铁话呢位AI姐姐一路学习紧，提供嘅资讯会越来越准确，方便为乘客提供所需协助。
港铁除咗不断提升本地车站服务，亦积极经营海外市场。欧阳伯权指，港铁喺澳洲悉尼嘅西南线，已进入最后测试阶段，仲有两、三个月就可以正式投入服务，而喺深圳兴建中嘅13号线亦有望好快完工。
佢回忆年轻时，经常喺报纸睇到批评港铁工程搞到弥敦道乌烟瘴气，如果唔系当年大家忍受，唔会起到一个咁好嘅地铁网络，今时今日嘅交通便会好麻烦，承诺会继续谂多啲新嘢，服务市民。
港铁企业事务及品牌总监蔡少绵分享港铁喺环保方面嘅工作，指显径站为绿色车站试点，站内装有各式各样嘅太阳能板，无论窗上定地板都可以收集再生能源；乘客每日搭嘅列车，喺煞车一刻也能产生能源，收集起来，每日取得嘅能源大概系全港7700户全年用电。
KellyChu
港铁主席欧阳伯权预告嚟紧将会有好多节目推出。
最Hit
更多文章
