古星辉 - 5G「耆」想 | 乜都5G
人口老龄化系唔少社会面对嘅问题，以香港为例， 有预测话到咗2046年，每3个人就有1个系65岁或以上；到咗2050年，超过4成人口会喺65岁或以上，届时香港将成为全球人口老化程度最高嘅城市之一。人老咗，难免需要更多支援，更多陪伴。面对呢股沉重嘅社会压力，除咗输入外劳，结合5G通讯普及乐龄科技，可望纾缓相关问题。
要普及乐龄科技，先要有可靠嘅电讯基建，香港嘅商用5G服务已覆盖超过9成人口。早前政府亦已立例建议新建楼宇，须预留空间比电讯商摆放流动通讯设施，方便进一步扩大5G网络。
最近留意到古洞北新发展区内，落成启用不久嘅福利服务综合大楼，就特别预留咗流动电讯设备机房俾电讯商摆放5G基础设施，体现咗流动通讯同水电煤等公用事业一样重要嘅角色。该大楼有7间安老院舍及两间严重伤残院舍，可容纳约1800人；有好嘅5G基建，可协助安老及复康机构打造智能家居系统及采用乐龄科技设施，提升老友记及院友嘅生活质素。
乐龄科技助长者复康
要开展「智慧安老院舍」，除咗有良好嘅通讯基建外，亦要物色合用嘅乐龄科技应用方案配合，呢啲方案一般以三个目标为主：第一是改善长者生活质素。智能机械人喺呢方面大派用场，不但可于院舍负责接待、清洁及巡房，机械人及机械宠物更可陪伴老友记，同佢哋互动，并且支援虚拟探访服务。
第二是帮助长者复康，例如建立智能健康管理系统及提供遥距视像医疗服务等。乐龄应用方案还可配合扩增实景，透过游戏和运动，加强长者嘅肌肉训练，改善手眼协调。另一方面，使用5G虚拟实景，亦有助中风或认知障碍患者治疗复康，重新探索社区。凡此种种，皆有助纾缓护理员及照顾者嘅压力。
第三是健康风险评估及预防疾病。乐龄科技配合5G，能打造最强嘅物联网。还记得第一代嘅智能防跌拐杖吗？时至今日，喺洗手间、浴室，以至睡加设感应器，装设跌倒警报系统，当侦测到长者有危险时，能立即通知院舍工作人员或照顾者，保障老友记安全。
香港举行咗乐龄科技博览暨高峰会多年，期待喺下半年见到更多新嘅乐龄科技出现。加埋我哋电讯商一齐帮手，老友记就可以「智慧养老」，安享晚年。
和记电讯香港执行董事及行政总裁
古星辉
