古星辉 - 5G AI电动单车　全天候开Live | 乜都5G

乜都5G

古星辉

2024-05-10 02:00 HKT

阅讀更多

产经专栏

內容

电动汽车内置上网功能已经不是新鲜事，估唔到呢股潮流即将去到电动单车。早前一间厂商宣布即将推出全球首部5G电动单车，结合AI物件侦测功能，为交通工具写下新标准。

　　内置SIM卡嘅单车，喺几年前推出NB-IoT嘅时候曾经出现过，当时主要用嚟辅助定位。至于呢部5G电动单车，外型上同其他电动单车分别唔大，不过加入5G连线就令佢嘅功能更多样化。

　　呢部单车「麻雀虽小，五脏俱全」，车身前方配备6400万像素镜，另有800万像素自拍镜头，车尾就有一个200万像素镜头，可视角度达140度，配合AI传感器可以监察附近交通情况，佢嘅AI预判功能更可侦测附近物件及防止碰撞，适时向车主发出提示，令车主踩单车时可以更放心。路上驾驶最重要安全，呢部电动单车喺安全方面交足功课，当车主未戴上头盔嘅时候，单车会发出提示，甚至唔戴头盔唔会畀车主开车，一于安全至上。

一站式开live直播单车旅程

　　呢部电动单车前面有个7吋萤幕，就好似汽车嘅仪表板一样，提供车速、距离、电池状态等资料，连导航功能都系靠佢。平日喺YouTube见到唔少单车友钟意喺单车加部运动相机拍片，坐呢部电动单车就唔使咁论尽，车前嘅高清镜头嘅影像，可以透过车身内置5G传送上网，随时开Live直播美好风光。而车主又可以用自拍镜头同其他人视像通话，如果系同其他单车友组队出行，仲可以喺萤幕上见到队友位置，达至车与车之间嘅联系。

　　另一个实用嘅功能，就系车主可以透过应用程式去锁车或者解锁，甚至以GPS追踪位置及设定路线限制。有时去到郊外想玩吓休息吓，单车嘅5G仲可以化身流动Wi-Fi，方便不同装置连线上网。

　　将5G植入单车的确有新意，令出行更多姿多采。日后电动单车喺香港合法化之后，期望喺路上可以见到呢款5G电动单车。

和记电讯香港执行董事及行政总裁
古星辉