古星辉 - 港首个邮轮5G海上直播｜乜都5G

古星辉

2023-03-10 00:00 HKT

阅讀更多

內容

香港逐渐复常，国际邮轮亦开始返嚟，「名胜世界壹号」今个星期就到咗维多利亚港，准备今晚起航，接载游客体验别具特色嘅海上之旅。

为隆重其事，香港中乐团今晚会喺邮轮上嘅直升机坪演出，我哋电讯商亦会大胆尝试，破天荒喺海上做5G现场直播，等全球观众可以喺中乐团嘅YouTube和Facebook同步见证香港嘅精采旅游盛事！今次系全港首个邮轮5G网上直播，系5G场景应用一大突破。

讲到5G直播，相信大家都唔会陌生，喺过去几年疫情期间，5G直播音乐文化艺术表演、讲座、会议、教学等应运而生，但今次喺海上直播，要做到高清、流畅、稳定，难度级别肯定超过十分！
须反复测试海上网络讯号

我哋特别为今晚嘅盛事度身配置专用嘅5G网络资源，服务水平达最高级别。要做到直播流畅稳定，首要处理嘅系讯号接收。茫茫大海，航道纵横，四周又无屏障，维港两边基站嘅信号好容易喺海中心互相干扰。因此网络团队须反复测试海上网络讯号、调校天线角度，模拟真实场景，减低复杂环境因素对直播嘅影响。

其次，邮轮喺海上航行，位置不断改变，亦为收发信号添变数。再加上天有不测之风云，万一大雨或大雾，要保持5G直播嘅专业质素真系一个好大嘅挑战。

可能有人会话，勤力啲测试、改善同固定网络讯号，自然可以熟能生巧。但系呢次场地系海上楼高13层嘅邮轮，我哋嘅工程人员平日只能喺三层高嘅「维港游」嘅露天甲板模拟测试，即使大家竭尽所能，唔到直播一刻，都唔知真实环境如何。喺唔能够有正式彩排嘅情况下，要驾驭5G现场直播，真系要有冒险精神，同埋天时、地利、人和。

自古成功在尝试，我非常欣赏同事勇于接受挑战迎难而上！希望今晚嘅直播顺利，诚邀大家一齐见证呢个时刻！有兴趣人士可于今晚幻彩咏香江表演后，约8时10分扫描以下二维码欣赏5G海上直播音乐会。
和记电讯香港行政总裁
古星辉