古星辉 - 建设智慧香港开新篇｜乜都5G

古星辉

2022-10-21 00:00 HKT

阅讀更多

內容

前日公布的最新一份《施政报告》中，好多议题都值得大家留意，作为电讯业嘅一份子，笔者对每次《施政报告》嘅创科部份会特别关注。

今年其中一项提案系政府将于明年修例，指明新建楼宇须预留空间装设流动通讯设施，极受我哋流动网络营办商欢迎，对未来智慧香港发展踏出重要一步。
增强流动网络覆盖

众所周知，5G结合大数据及人工智能等技术，系发展智慧城市嘅重要基石。一个全面覆盖嘅5G网络绝不可少，而要建设一个覆盖容量兼备嘅5G网，发射站嘅数目要比4G多一倍，所以工程团队一路为发射站数目跑数，据知一直遇上唔少难题。
当流动通讯渗透率超过325%，大家睇电话多过睇电视，就发觉流动通讯渐渐成为生活必需品。事实上，我哋业界喺2019年起积极同政府建议，赋予电讯商享有公用事业如水电煤公司嘅同等待遇，即系有权喺楼宇、商场等地方安装电讯设备，唔需要再同发展商或管理公司逐一周旋。

今次《施政报告》嘅提案，可以话系为我哋提升及改善覆盖创造有利条件，以作发展金融、零售、教育、艺术等解决方案应用嘅基石，为建设智慧香港开新篇，令我哋感到相当欣喜，见到政府创科发展施政方面嘅好方向、好开始，希望日后可以简化安装发射站嘅审批流程，令我哋建网事半功倍。

讲到呢度，令我联想起近日喺社交媒体同讨论区见到有人讲起，几个营办商喺日出康城嘅接收麻麻，通常咁嘅情况，营办商一定有佢哋嘅难处。期望《施政报告》嘅新举措及发展方向，令各持份者明白电讯商多年嚟所面对嘅问题，抱持开放态度，共同圆满解决有关问题。
和记电讯香港行政总裁
古星辉