古星辉 - 绿色科技．环保5G｜乜都5G

乜都5G

古星辉

2022-10-14 00:00 HKT

阅讀更多

产经专栏

內容

5G自2020年4月推出后，电讯商努力铺建基站，以提供最全面覆盖。随住基站数目增加，流动网络基站须依赖持续嘅电力供应以维持服务；用电量难免上升，所以我哋好重视节能。我哋嘅工程团队研究咗好多方案，确保喺拓展5G覆盖之余，能保护环境，达至可持续发展嘅目的。今日同大家分享我哋用咗一个新方法处理由基站产生嘅化学废料。

一般用户未必知道，其实位处策略性位置嘅基站同交换中心，例如喺主要高速公路、大型屋邨、工商厦等，电讯商都会为基站配备后备电池，以防电力供应不稳或天气恶劣，特别系行雷嘅时候，好容易跳电，有咗后备电池，就可以确保网络运作流畅。
后备电池寿命约5年

后备电池名为「铅酸电池」，非常重磅，一般用5年左右就要更换。呢啲无用嘅铅酸电池，属于化学废料嘅一种，以前要由供应商运到外国处理；直至近年，我哋成为香港电池回收中心嘅绿色伙伴，开始将废电池交俾佢哋位于屯门环保园嘅中心处理。

呢间本地回收中心系第一间获得政府许可嘅废铅酸电池回收再用工厂，佢哋会转废为材，从废电池当中提取铅，而铅本身系重金属，系有用嘅原材料。以清洁安全嘅方法处理废电池，可以减少污染水土嘅机会，而唔使再将废料送去外国，减少运输，亦有助减低碳足迹及应对气候变化。我哋喺今年7至8月期间，收集到约6.5公吨废铅酸电池，预期年底回收量将超过10公吨。

公司除咗一直积极采纳唔同嘅环保方案，亦致力提高大众嘅环保意识。我哋早于2012年推出嘅手机及配件回收计划，今年已踏入10周年！喺全线舖头收集到嘅旧手机、配件、电池、充电器、耳筒、耳机、USB线等，会转交业界嘅「电脑及通讯产品回收」计划处理。正常运作嘅配件翻新后就捐畀有需要人士，而零件同有用嘅物料就回收再用，长远为保护地球尽一分力。
和记电讯香港行政总裁
古星辉