古星辉 - 电讯界全力支援方舱抗疫｜乜都5G

古星辉

2022-03-25 00:00 HKT

阅讀更多

內容

■网络商会被指派负责不同方舱建设网络，即兴建基站、放置讯号天线及铺设光纤专线等，完成后再供其他网络商接入。

第五波疫情爆发两个几月，每日确诊人数依然达五位数字，呢段期间各界支援市民不遗余力，总之要齐心抗疫。其实电讯界由一月起已经喺度密密做，务求要以最可靠嘅服务陪实大家，即使足不出户或者隔离期间，都仍然有高速流畅嘅网络系隔离撑住大家。

记得喺第五波啱啱开始，即系一月初𠮶阵，电讯商已经为需要入住检疫中心强制隔离检疫嘅市民，免费提供4G同5G数据，等佢哋喺隔离期间唔会与世隔绝。
建网工程需要快狠准

大家记得农历年后确诊数字直升，政府即时拍板兴建社区隔离治疗设施，即系方舱医院，而呢啲地方除咗水电煤之外，电讯服务亦都系必需品之一，事关无论系医护人员、工作人员定系隔离治疗人士，都需要同工作伙伴及亲友联络，隔离治疗人士更需要睇片解闷，所以有关当局好快就同四大网络商联络，商讨有关喺落马洲河套区、启德、青衣、前新田购物城、港珠澳大桥香港口岸、粉岭马适路、洪水桥、元朗潭尾及竹篙湾嘅方舱建网事宜，每个网络商被指派负责系唔同方舱建设网络，即系兴建基站、放置讯号天线及铺设光纤专线等，完成后再供其他网络商接入。

据知，喺咁多个位置入面，以落马洲河套区同启德邮轮码头呢两个位置嘅建网难度最高，前者设过万个床位，范围相当广阔；后者楼高四层，建筑面积逾14万平方米，提供超过3000个隔离单位，呢啲工程要快狠准，要喺极短时间之内就要完成，所以负责筹划呢两个地方嘅牵头网络商真系少啲实力同经验都唔得！
5G机械人或可派用场

各大方舱医院有完善嘅流动网络，如果只系用嚟打电话同上网就有啲嘥料，近期大家见到愈来愈多嘅5G机械人应用方案，话唔定可以喺方舱医院大展拳脚，用佢哋帮手派药、送餐，仲可以帮手消吓毒，可以更有效安排医护人员嘅人手调配，令接受隔离治疗嘅市民有更好嘅照顾，所以5G机械人绝对谂得过！
和记电讯香港行政总裁
古星辉