乜都5G——经贸双循环企业要追「数」

乜都5G

古星辉

2021-12-10 00:00 HKT

阅讀更多

产经专栏

內容

　　要数年底盛事，必有「香港经济峰会」，来自城中政商界、金融界同地产界等翘楚均会出席分享真知灼见。今年的重量级嘉宾包括特首林郑月娥、财爷陈茂波及金管局总裁余伟文等。
　　我代表公司出席过几次峰会，感觉是嘉宾分享相当高质，为与会者带来极高养份。今次大会主题是「十四五规划．经贸双循环」，我参与了其中一节专题讨论，从流动通讯营办商角度介绍一下5G通讯技术及物联网于工业数码化担当嘅角色。
　　我哋近年所讲嘅物联网、智慧城市、数码化及再工业化等，全部需要透过流动网络作为传输媒介，所以世界级嘅网络基建必定系首要条件，而香港网络基建以及流动通讯嘅渗透率都系喺全球领先嘅位置，喺早前特首嘅《施政报告》已经指出香港嘅5G覆盖范围同稳定性分别排行全球第一及第二，而喺另一个讲全球5G使用率嘅报告入面，全球头十里面有两间系香港嘅营办商，其中一间仲系排名第四。
　　另一方面，香港嘅流动服务用户渗透率超过305%，即系话平均每人有三个电话号码；而喺25至64岁年龄层嘅智能手机渗透率更超过98%。有咗呢啲网络同用户嘅基础，即系已经为唔同行业数码化做好准备。

　　不得不提仲有政府嘅积极推动，例如以合理成本令营办商投得频谱，以及将以前模拟电视广播嘅中低频段频谱（700兆赫）释放，等营办商铺建一个深层覆盖嘅5G网络；另外，当然仲有好受欢迎嘅「鼓励及早使用5G技术资助计划」，为香港嘅工业数码化加速。
政府积极推动工业数码化加速
　　其实我哋现时只系见到5G嘅部份威力，未来更会有切片技术，可以建设小区私有网络，并且满足大容量及低时延等不同需求，支援更多对网络有更高要求嘅应用。另外，亦可以透过加强教育，令大众对网络安全以及风险管理方面平衡有更深认识。
　　希望持份者可以发挥香港呢个优势，喺双循环宏观大政策之下，唔好落后于人，将更多具创意嘅方案落地，推动工业全面走向数码化。
和记电讯香港行政总裁
古星辉