头条戏场 - 《痛爱完成式》 睇到面红自虐爱情片 | 头条戏场
头条戏场
2024-10-04 02:00 HKT
字體大小
一套戏的男女主角不和会否影响观众入场意欲？用数字答你，《痛爱完成式》制作成本只需2500万美元，截稿日票房去到3.35亿美元。男主角Justin Baldoni身兼导演，而女主角Blake Lively亦系监制，两人拍到连朋友都冇得做，更懒得扮冇嘢，连一张为电影宣传的合照都冇，讲真几好笑。电影属阴功爱情片，同样有童年阴影的两男一女主角爱得死去活来，戏名都话咗畀你知，痛爱呀。戏外反目成仇，戏内难舍难离，当然要入场食吓花生啦。（上映中） 撰文︰廖思慧
电影改篇畅销爱情小说，女主角Lily（Blake Lively饰）自细受父亲家暴妈妈影响，童年非常唔快乐，嬲老窦格衰，更嬲阿妈太懦弱，大个女即刻搬走， 然后跟好靓仔的神经外科医生Ryle（Justin Baldoni饰）一见钟情，睇样都知男方多女埋身亦唔会认真，难得佢亦承认只爱玩一夜情，但因为好爱好爱Lily，茶饭不思，连工都唔想返，咁鬼靓仔玩深情，仲要flirt女技巧可以用教科书级形容，特别是两人天台初见面一幕，睇到全程嘴角向上，事后先知Blake Lively老公，即「死侍」Ryan Reynolds有份度，难怪导演再嬲多啲。
全片系咁锡锡
《痛爱完成式》属典型美国爱情电影，剧情好简单冇转弯抹角，讲述原生家庭创伤对子女成长有几大影响，Lily想揾个脾气好嘅另一半，偏偏钟情脾气突然暴躁的Ryle，仲有初恋男友Atlas（Brandon Sklenar饰）突然出现，3个主角都好靓，乜都唔做企喺度已好赏心悦目，谈情说爱好甜，冇沟通有误会好惨，3个人兜兜转转，好似中学生睇嘅爱情小说，又甜又滞但又睇到会心微笑。
头条戏场
佢就系神经外科医生Ryle，亦是本片导演Justin Baldoni。
Ryle同Lily拍拖场口好好睇，睇到心猿意马。
Ryle胞妹开入伙P，Lily亦被邀请，饮多两杯出事咯。
天台一幕，睇到面红甜笑，我讲我呀。
少女Lily同初恋男友，两人都生于家暴家庭。
Lily戏服好靓亦好多样化，做监制自肥都好正常嘅。
Ryle怀疑Lily偷食所以好嬲。
最Hit
屯门七旬翁帮朋友修理窗框 失足堕楼当场死亡
16小時前
九旬婆婆北区医院大堂弹琴 路人伴唱《万水千山总是情》 网民大爆婆婆猛料身世｜Juicy叮
2025-11-14 13:32 HKT
洪天明承认周家蔚多次提离婚 流男儿泪指太太「可以得到更好」 自嘲冇吸引力惹飞来蜢
2025-11-14 11:00 HKT
更多文章
