头条戏场 - 《真的狠爱你》快乐睇肉｜头条戏场
由《毒瘾女孩》上位巨胸女星Sydney Sweeney及《壮志凌云：独行侠》型爆刽子手Glen Powell主演的浪漫性喜剧，睇预告已知全片重女，男角质素亦相当高，有样有靓绝Body塞满103分钟，加上多咸多趣全澳洲拍摄，笑位够抵死，最重要男女主角Chemistry超劲，性张力澎湃，flirt到我都睇到唔好意思，难怪传两人戏外搭上咗。好耐冇睇过呢类「唔带脑入场系」romcom，轻轻松松2粒钟，疯狂笑完散场超满足。（上映中） 撰文：廖思慧
电影在北美开画后票房越战越勇，上映后一直稳据票房榜首，力压多部热门电影，日前全球票房更突破1亿美元，是继2016年《BJ单身日记：生得啦BABY》后，成绩最好的限制级喜剧，咁一定有续集嘞。
笑到好攰
因为一次借厕所事件，Ben（Glen Powell饰）对Bea（Sydney Sweeney饰）一见钟情，又靓仔又好人女方即沉船，即晚已登堂入室，双方都以为可以告别单身狗，世事就系咁，咁如意就冇戏做啦！一次朋友聚会，两人相遇，一夜情人变仇人，火药味极浓，仲要蔓延至女方姐姐的澳洲婚礼，两个火球一碰即爆炸，预计到婚礼应该好大镬，饮大两杯仲得了嘅？为平息民怨，两人决定假扮情侣希望令亲友们安心，然后出事嘞！靓人靓景仲要全片差唔多冇乜点着衫，又揽又拖同房瞓仲要跌埋落海，期间发生大量错摸兼笑料，引你笑密度大约几分钟1个小笑位，10分钟1个大笑位，真心笑到有啲攰。
戏中女角个个都识发光，又靓又好身材，演Ben前度的澳洲版王丹妮Miranda（Nat Buchanan饰）幕幕「春光明媚」，比坚尼个上身size同乳贴一样咁大，长期唔带bra，衣服露肉度极高，睇嚟佢好憎着衫。另外隆重介绍，Miranda戏中嘅PT情人，老翻雷神Beau（Joe Davidson饰），角色设定好废但亦最好笑，基本上一开口就引到你笑，百发百中，但网上资料唔多，希望以后多啲机会见到佢啦！
