头条戏场 - 《一球翻身》笑料供应量充足｜头条戏场
头条戏场
2024-01-26 00:00 HKT
字體大小
电影改编真人真事，2001年世界杯外围赛，美属萨摩亚足球队被澳洲队丧炒31比0，成为足球史上最大笑话，自此球队长期在FIFA世界排名中包尾。2011年，世人眼中的垃圾球队竟奇迹爆大冷踢赢对东加的赛事，全世界齐跌眼镜，何其壮观。拍过《雷神奇侠3：诸神黄昏》 及《雷神奇侠4：爱与雷霆》的导演Taika Waititi对题材好有兴趣，即揾嚟型棍Michael Fassbender做燥底教练，执教一队如《少林足球》式的屎波杂牌军。美属萨摩亚靓景加数唔到咁多笑位，又warm又chill，真心好睇㖞，烂番茄指数低成咁无嘢呀嘛？（上映中） 撰文：廖思慧
故仔好简单，被全球甚至自己人都睇死的球队冇放弃自己，为经营呢队屎波之霸，当地足总负责人及球员都要打几份工，但踢极都冇起色，兴趣班式练波点会有运行?足总阿叔非常心灰，决定重金招聘新教练，明知山有屎当然冇教练愿意应征，然后，有位教开劲队的失意教练「废Sir」Thomas Rongen（Michael Fassbender饰）被放逐到当地入职，由落机一刻已对所有嘢睇唔过眼，又灰又火滚又好笑又打又闹的励志故事就此展开。
令自己快乐做人先有意义
电影绝对是导演Taika Waititi回魂之作，美属萨摩亚球队比赛前的「战舞」文化，加阿猪阿狗都去踢波，玩搞笑的球技相当过瘾，一贯导演的幽默低能搞笑风格，笑点够生活化，对白非常好笑，程度系会令你不断笑出声，睇戏当日有大量麻甩佬笑到猪叫咁，真心好睇过《雷神4》1亿倍。
电影好阳光，Fassbender拍喜剧原来好好睇，属典型正能量运动系电影，带出「踢波啫，玩嘅过程比赢更重要」信息，以及人生的下半场一样可以好精彩，好老土但又被佢治瘉到。
最Hit
更多文章
