阿碌开咪｜新加坡揿住香港砌
《名家合集》收录名人文章，分享观点，探讨时事。
2022-08-05 09:45 HKT
字体大小
呢个世界，一定要有竞争，才会有进步。不论人与人、机构与机构、城市与城市、国家与国家，全部最好永不停步竞争，才能永远向前，如此，前景肯定灿烂！
竞争时，有人用明招，有人用暗招，只要合法，绝无不可。其中一招，正是——趁你病攞你命！讲得好绝，但讲竞争，难道当你对手弱时，你放软手脚？简简单单如在球场上，你当然趁势将对手放干，等佢冇得追！
最近疫情稍敛，几位商界朋友，匆匆前往亚洲各国处理业务。前晚回港重聚，一致看法：「香港今次大镬，中正不进则退大理论！」
点解？因为我哋最大竞争对手新加坡，趁香港仍窒下窒下唔开关，而就算开少少都行一步退三步，于是睬你都儍，睇准我哋「防疫死穴」，一刀刀系咁插落去，包括抢资金、抢人才、抢游客，政府全攻型去马，瞓晒身。
老友M骚畀大家睇一张海报，展示新加坡大力全球出击的宣传攻势。背景为最现代化的一级金融中心大楼群，标题口号——《The Best Time To Move Is Now》！内文形容新加坡政治经济环境稳定、汇聚全球顶尖人才、效率快速、出入自由……结论——喂，所有跨国集团都嚟晒喇，你仲唔动身？
唉……曾几何时，以上令一个城市骄傲的优势，乃香港四围宣传的强项。如今？竟然比新加坡揿住打，也揿住抢（资金、人才及游客）！
点解？大家心知，但好难尽情全盘分析，再要求政府立即逐一解决。
事到如今，要拆墙松绑，市民无权无勇，当然冇得搞，一切仍要睇睇新特首、新班子有乜视野、有乜魄力嘞。
讲真，同是国际城市，新加坡真系有条件「串」我哋㗎。简单，香港GDP次季跌百分之一点四，睇嚟会继续缩。但佢哋呢，第一季升百分之四，第二季升百分之四点八。
香港输喺边？有冇掌权者能以辽阔胸襟认认真真查找不足，再开诚布公，然后急起直追呢？我好想见到！
曾智华
阿碌开咪
Jisun Han / Unsplash图片
最Hit
纸巾抹眼镜不会刮花？洗洁精恐损镜片变蒙 专家拆解洗眼镜谬误+1分钟正确清洗技巧
2026-03-15 10:00 HKT
本地餐饮业新模式？人气牛扒店铜锣湾Pop-up晚晚爆满 创办人成功把握1商机：双赢做法！
2026-03-14 11:15 HKT
更多文章
