【金融High Tea】《国安法》炒股蓝图
仲有一个星期，上半年就会过去，中环茶友有个问题，就系半年结来临应否沽货。茶友呢个问题主要系因为港版《国安法》好大机会赶喺七‧一前出台，所以要谂谂是否应该趁机减磅。
《国安法》上星期提交人大常委审议，外界关注跟住会否公布全部条文，最后官媒只系参考人大法工委嘅讲解出咗新闻稿，交代咗法案重点，包括法例有凌驾性、特首会挑选法官、在港成立国安公署、特别案件可能交由内地审讯。茶友唔讲政治立场，关注法例会唔会引起投资震荡。呢个问题嘅答案，唔系中央能够解答，反而系要睇西方，特别系美国嘅反应。
细节出台 需防万一
从方案至今披露出来嘅细节，人大立法好注重包底，即系唔怕一万，最怕万一，好似案件可能由内地审讯，就系防止一旦涉及重大国家机密等极严重事件，有权返回内地审讯。从呢种心态，估计出嚟嘅详细草案软极有限，中央虽然希望尽量减低西方对立法嘅抗拒，但可以退让嘅空间有限。由人大议决立法至今，美英回应有啲雷声大、雨点小，美国虽然话会考虑制裁，但一直未有具体详情，上星期美国国务卿蓬佩奥同国务委员杨洁篪会面，大家倾咗6、7小时，虽然事后传出双方有龃龉，但就唔见总统特朗普真正出招，估计白宫好可能系等整体法案出台，先一次过回应。喺同一时间，中国就启动向美国购买小麦，展露出降温倾向。
有熟悉美国政治操作嘅猛人估计，人大为香港立法，美国唔可能无动作，如果美国提出制裁个别大陆官员，以至收紧香港高科技进口，呢样属于预计范围内嘅结果，消息好大程度已经消化，真正敏感嘅系喺金融领域上出招，佢相信出招嘅机会仲系较细。
目前已发展国家对中国嘅态度系你眼望我眼，因为大家都唔想失去市场。美国系最杀声震天嘅一个，其回应划出咗反对措施嘅上限。大陆今次向香港落政治重药，都明白会带来难以预测嘅政治风险，所以立法之后，好大机会宣布一啲利港措施，以防政治震荡带来嘅冲击太大，所以好可能条文出台同美国宣布制裁，就系坏消息最猛嘅时间，然后视乎情况变化。
如果《国安法》真系七‧一前后出台，按照呢个立法如何去制订炒股蓝图，就要睇本身嘅持货能力，为万一出现恶劣局面做准备。若然本身现时揸到成手股，当然就唔可以当立法嘅政治风险无到，因为正路个市都会插落嚟，手头无资金可以低吸，处境就会好被动。正常而言，喺坏消息公布前大市好难猛升，故此策略不宜太勇，反而如果形势同估计发展相似，消息明朗时就有机会低吸博炒利港措施。
个别大股已见利好政策
受美国股市上周低收影响，港股偏软，跌幅一度超过200点，随美股期货下午回升，恒指跌幅稍为收窄，报24511，跌132点；国企指数收报9879，跌95点，成交1199亿元，个别大股已受内地利好政策消息刺激道逆市造好。蓝筹表现最抢眼系港交所（388），急升3.7%，收造311.6元。中概股回流暂时稍歇，但仍不断有医疗股上市，港交所短期不愁热闹外，仲传出内地批准A股在港发行衍生工具，若然成事，在港炒衍生工具吸引力当然比较高，带动该股成为最先挑战新高嘅强势股。除咗港交所，内地创业板注册制首批企业将亮相，同时下月推出上证科创板50成份指数，市场预期有望吸纳海外资金，变相利好内地券商股，光大证券（6178）急升5.4%，收报5.27元；招商证券（6099）抽高4.75%，收报8.59元；中国银河（6881）飙4%，收报4.21元。另一只逆市升嘅友邦（1299）亦因为上海分公司已改建为人身保险子公司嘅申请获批，收升1.8%报73.1元。
另一突出板块系金矿股，主要受惠于金价造好，纽约期金曾炒上1753美元。美国又话再推刺激方案之下，大行睇盎司金价可以挑战2000美元，推动金矿股向上。山东黄金（1787）急扬4%，收报21.85元；招金（1818）升3.4%，收报8.7元；紫金（2899）走高2%，收报3.42元；中国黄金国际（2099）走高2.2%，收报3.76元；SPDR金ETF（2840）涨0.87%，收报1272元。
陆羽仁
原文刊于《头条日报》
