分享智叔育儿心得勿标签小朋友蒋祖曼获黎耀祥教佢喊

头条日报-娱乐

更新时间：00:00 2023-01-04 HKT
发布时间：00:00 2023-01-04 HKT

37岁「独立电影女皇」蒋祖曼（Joman）近年转投TVB，新剧《轻．功》更首做女一，受公司力捧。Joman形容今次是考牌之作，除跟「视帝」老窦黎耀祥有唔少对手戏外，又要「扯火」闹人，亦有喊戏，故剧集播出前令她相当紧张，「好彩算系过到关，唯独好多人评论我太恶死。」采访：方骞平

对被指太恶死，Joman就有话要说：「其实系角色性格设定，为咗要有反差嚟凸显个角色。原先我演绎咗个关怀版，但监制唔收货，连祥哥及龚姐（龚慈恩）都叫我放胆大闹，唔使咁善良，因为好多仔女就系咁㗎……」她回忆返首次「闹爆」祥哥时，她吓到声到震埋，好唔惯。
前辈教路好幸福

不过，Joman庆幸有前辈「教路」，觉得系一件幸福嘅事，尤其自己少眼泪，拍喊戏会有难度，「我有请教祥哥点样先可以喊到得心应手？佢好耐心教路，反过嚟安慰我，唔使咁紧张，就算佢人生经历比我丰富几多，谂到唔开心嘅嘢会容易喊一啲，但都要时间准备。」

现实中的Joman系好妈妈及好后母，除非子女触碰到底线，她才会严肃发恶，「继子Day仔今年经已16岁，我同佢相处就似戏中『细佬』朱敏瀚咁，作为父母沟通关怀好重要，但要尊重佢想法，如果佢太听我话就会冇咗自己，唔会有进步，我赞成智叔（廖启智）生前同我分享嘅育儿心得，唔好标签小朋友系曳，而系将佢定性为好动及充满好奇心。」目前Joman事业和家庭两兼顾，工作带给她好大成功感，唔想畀佢停，仲想拍吓古装剧，她表示目前收入一定好过以前，至少唔使系咁等机会。