封「民选视帝」心情靓踢波满场飞林敏骢唔恨攞奖无助叫高片酬：奥斯卡就话啫

头条日报-娱乐

更新时间：00:00 2022-12-14 HKT
发布时间：00:00 2022-12-14 HKT

63岁林敏骢（大师）处男剧《下流上车族》叫好叫座，于台庆颁奖礼前夕，被封民选视帝。不过入行逾40年，好明白游戏规则的大师就打定输数，笑住泼自己冷水：「可能打波先嚟落雨呢！」他坦言，拎视帝无助拍戏叫高片酬，「拎奥斯卡就话啫。」仲菩萨心肠表示留返畀有需要嘅人。采访：方骞平摄影：邓国良

剧中暖男「车志明」深入民心，林敏骢演技获网民激赞，尤其感人情节，连一班冇追开电视剧的市民都追睇，反应意想不到咁好。日前大师去踢波，开波前不忘笠队友高帽：「介绍返……呢度有影帝张兆辉、白色视帝马国明……」对此，马明尴尬回应：「咸丰年咁耐啦，啲人唔记得㗎喇。」大师却对他夺视帝印象最深。落场后，大师控球在脚自信满满，带住个波满场飞，成个足球小将咁，相当精神。
视帝留畀有需要嘅人

对于被封「民选视帝」，大师难掩内心兴奋：「剧中我听住江美仪提出离婚嘅语音短讯，凝望着眼前全家福相片爆喊呢幕，网民评论话『直接攞视帝！』哗！得到咁多人认同我几开心呀，佢哋真撑我唔系假㗎，我合埋眼已感受到佢哋亲手颁咗个奖畀我，那怕系一嚿胶。」

入行超过40年，对攞奖非常挑通眼眉，「换咗系我公司搞嘢，都会优先畀自己人啦，呢个好正常，由『亲生仔』攞都好，佢哋努力咗成年拍咗咁多套戏，突然喺石头爆咗个笃眼笃鼻嘅出嚟，系人都唔忿气啦！其实我攞唔攞视帝都冇所谓，一样咁开心，正如球王美斯及C朗咁好波，都冇攞过世界杯冠军，自己唔系好需要视帝呢个衔头，无助我拍电影会收贵啲，换着拎奥斯卡就话啫，倒不如留畀有需要嘅人。」他坚持今次已超额完成，赢咗几条街，冇令曾志伟难堪，「其实曾志伟揾得我啱，我将过往拍电影嘅经验放落去，放大啲感动位，尤其新人芊芊（郭柏妍）及蔓蔓（罗毓仪）喊得出，识得临时加戏畀佢哋发挥，咁先好睇。」
提议今年要玩双视后

对于陈百祥及汪明荃都睇好他拎视帝，大师不失搞笑本色：「志伟及阿叻都信唔过，志伟用完即弃，《东华》前冇揾过我，亦冇邀请我去台庆颁奖礼，我唔系随传随到咁得闲㖞；阿叻系『明灯』，佢话荷兰及阿根廷会出局，两队都打入世界杯8强，咁就死得啦；反而阿姐较可信，但佢成日畀罗家英误导……」

问到心目中视帝，大师变返正经，「撇除『亲生仔』因素外，其实信心都系一半半，因为佢哋拍剧经验多过我好多倍，尤其山聪及煎Pang（陈展鹏）佢哋交得出呢啲演技，证明对做戏好有心得及体会，而我只系用我方法嚟达到我所要嘅效果，所以我都想上网睇返佢哋演出学吓嘢，畀我话事嘅话，我会好似曾总咁讲句『打和』哈！咁样系最好喇！」他同样建议今年TVB设双视后，因为「民选视后」鲍姐及江美仪冇得输。