饯别宴被狂集邮老公黑晒面黄夏蕙笑谈性生活︰老夫老妻都有开心嘢

头条日报-娱乐

更新时间：00:00 2022-08-05 HKT
发布时间：00:00 2022-08-05 HKT

黄夏蕙（夏蕙BB）将于下周四（11日）随86岁老伴潘炳烈移民美国，上周六晚，夏蕙BB于酒楼举行饯别宴，《头条娱乐》记者现场直击，头戴皇冠嘅BB满场飞劲开心，不过老公潘炳烈因不满变成「吉祥物」，不断被要求合照而黑晒面，仲嬲到好似小朋友咁双手托头，真系好想递架玩具车畀佢玩呀。BB见状即谂计呵返，两位加埋近200岁嘅耆英夫妇好sweet！强调今年「只系」89岁嘅夏蕙BB更自爆性生活依然美满：「就算老夫老妻都有开心嘢嘅！」真系听到个心都离一离呀衰鬼。采访：方骞平

夏蕙BB人缘唔错，离港前相约一班老友于酒楼见面，同BB做咗几十年老友，80岁嘅卢海鹏就算行动不便一样现身；一班「亚视之友」潘志文、徐宝凤、魏秋桦、王玮出晒嚟，仲有邵音音、吕珊、车淑梅夫妇、刘雅丽妈妈包晓华、张伟文经理人方俊及方丽盈等。「千岁宴」每枱设有丰富席奖，台上有切烧猪、醒狮及演出助兴。
BB好怕老公发脾气

当晚方俊及方丽盈齐唱《世间始终你好》；包晓华、吕珊、魏秋桦合唱《万水千山总是情》。而最受「熟女」欢迎嘅「陈年男神」潘志文，独唱完《大地恩情》后便跟BB合唱「饮歌」《禅院钟声》，主人翁在台上致谢词：「我好想喊，好唔舍得大家，你哋太锡我……」虽然未见有泪光，但潘志文却拉高衫尾，作状帮她抹泪。全晚个个表现兴奋，替BB饯行之余亦跟其他圈中好友敍旧，唯独夏蕙BB老公潘炳烈好似完全唔关佢事，唔肯上台又呆坐主家席自斟自饮，原来佢不满入席前不断被集邮而面㶶㶶，更发老脾大闹：「影够未？」连夏蕙BB都吓亲，乖乖咁坐返埋佢身边，然后向助手打眼色，示意身边人帮手护驾，挡开陌生人。
夫妻相处勿讲大话

夏蕙BB随老公赴美，问到可会带备情趣内衣同老公玩吓惊喜？BB笑言唔需要，自爆两公婆仲keep住有情趣，她坦白说：「开心嘅嘢……乜嘢都有啦（包括性），就算老夫老妻都有老夫老妻嘅嘢！」再追问如何保持长久火辣辣时？她更兴奋地爆多两句畀大家听，骑骑笑说：「唔辣点可以有咁多年呀！」更坦言仍有性生活：「呢啲梗系有啦，系顺其自然！」不过，讲到同老公相处之道，BB就话最重要系坦白：「性生活反而系其次，千祈唔好讲大话，就算佢唔钟意都好，都要坦诚讲佢知！而且大家要互相忍让，有时佢叻畀佢叻，有时我叻畀我叻，大家系平等嘅。」
老公投诉BB唔检点

在旁方俊补充指夏蕙BB身材好，够开心，所以老公对她死心塌地，BB照单全收，得戚地和应一句：「系呀！我身材好。」经理人Simon则踢爆夏蕙BB其实好wild，笑指她打开「野战」：「有次送佢去新田垃圾站，老公接咗佢之后，两公婆好快就『消失』咗！据我所知，佢一返到屋企就唔着衫唔着裤，潘Sir曾投诉过佢：『你检点吓，拉咗窗帘先啦！』」BB听完偷笑解画：「可以放心，唔系咁样，只系除晒衫准备入去冲凉，呢啲系好自然嘅事，但佢惊我畀人睇到啫！」