《十八年后》首演恶女获赞谭凯琪现实对老公好温柔

头条日报-娱乐

更新时间：00:00 2022-06-21 HKT
发布时间：00:00 2022-06-21 HKT

谭凯琪（Zoie）最近在剧集《十八年后的终极告白2.0》，首次饰演恶女获外界赞赏，她开心新挑战有好反应，但她拍摄时刚生完BB，有一定压力，幸好对手个个好照顾。不过Zoie强调恶女只是演技，现实中的她好温柔，同老公任何事都有商有量，凑1岁半囡囡两人亦会分工合作。
采访：杜杜摄影：沈健程
发型：jamie@hair 化妆：Henry lee 饰物：Qeelin

对于剧中的恶女「Queenie」，Zoie演落先识惊，「好有挑战性，呢个角色对住个老公系好霸气，或者见到啲唔高兴嘅事，好敢去讲去闹，初初我都冇谂过会咁难演，可能系我自己个性格去演呢类型角色会辛苦少少，因为我平时讲嘢都唔会好大声，变咗要用好多气力去演。」演出获赞她当然好开心，「畀观众睇到谭凯琪有另一面，好多人睇到『哗！谭凯琪可以咁恶嘅！』我都开心㗎！」
边拍剧边揼奶

有好表现，Zoie觉得除了自己努力，监制以及台前幕后帮助好大，特别是她当时生了BB只是4、5个月，开工仍要忙于揼奶喂囡囡，「有时我自己都唔醒觉要做呢个动作，其他演员会帮我同导演讲，『你预返啲时间畀Zoie揼奶』，有时拍多两个镜头先到我，即刻走咗去揼，o依家阿女肥肥白白都多得各位。」

剧中Zoie演恶妻，现实呢？她即好肯定话：「完全唔似，我哋冇话边个恶唔恶，系平等，我哋系会buy个道理多啲，大家有商有量。」至于照顾囡囡BabyG，两夫妻亦会分工合作，「老公负责喂奶，夜晚佢一喊会去抱佢招呼佢，因为我𠮶时去咗拍剧，佢惯咗爸爸同佢瞓，我同佢瞓唔得，初初都伤心，o依家都觉得未尝唔系一件好事，而同佢玩、冲凉，同埋三餐膳食就系我安排。」Zoie更强调跟老公绝对不是怪兽家长，「我啱啱发现好似错过咗帮佢报N班，哈哈！睇吓o依家有冇学校收佢，如果有就唔使等。」