体操｜石伟雄宣布退役 香港「体操王子」结束26年运动员生涯
发布时间：18:49 2025-02-28 HKT
石伟雄宣布退役！香港「体操王子」石伟雄曾经在2014及2018两届亚运赢得跳马金牌，并且三度参加奥运会，包括2012伦敦奥运、2021东京奥运及2024巴黎奥运，是香港体操史上最成功的运动员。今日（28日）他正式宣布，结束26年运动员生涯。
石伟雄：26年体操生涯充满高低起跌
33岁的石伟雄，今日在社交网站发文，表示「过去26年体操生涯有甜酸苦辣，充满高低起跌」，他从每次低谷中学习与低潮、伤患共存，令自己成长。他在文中多谢教练Sergiy Agafontsev，陪伴他走过20多年旅程，以及家人的支持和体谅，还有体院员工及体记。
石伟雄早于6岁学习体操，9岁入港队受训。为了参加去年举行的巴黎奥运，他在争夺资格期间多次打止痛针医治伤患，一度有断脚风险。然而，这位香港「体操王子」为了代表港队比赛义无反顾，最终完成巴黎奥运之旅。巴黎奥运之后，石仔休养生息，再没有参加比赛，同时花时间指导师弟妹。今次石仔正式退役，未来是否转型教练抑或再有新发展，留待情况明朗化后才对外公布。
相关报道：体操｜石伟雄寄语年青选手珍惜资源 力保体院「精英A 级」地位不变
记者 吴家祺
石伟雄退役声明全文：
大家好，终于嚟到呢一日，过去每年呢一个月份都会见到唔同运动员回顾自己嘅运动员生涯，今日终于到我同大家宣布，我正式退役了。
过去26年嘅体操生涯既有甜酸苦辣，亦充满高低起跌；26年嚟体操带比我好多荣誉，包括两届亚运冠军，2次世界杯冠军，同时令我遍体鳞伤，但体操带我从每次低谷中学习点样与低潮、伤患共存中学习，令自己每日成长，成为今时今日嘅石伟雄。
好多谢我既教练兼总教练 Sergiy Agafontsev 陪伴我呢20几年既旅程，好多谢屋企人无私嘅支持同体谅，好多谢我既人生Mentor Dr.Lee，多谢体院同总会嘅栽培，好多谢我经理人Faye帮我打点一切，多谢一班劳苦功高嘅医生同治疗师，多谢体院一班上上下下既员工同同事，多谢一班体记朋友，好多谢咁多赞助商投资喺我身上，仲有好多好多人要多谢，抱歉未能逐一答谢。
由奥运后休养呢段时间发生好多事，亦都谂咗好多嘢，有啲系意料之内，有啲系意料之外；又好似做左好多嘢，又好似冇做过啲咩就过咗半年多；有啲嘢以为自己估到，又有啲嘢并唔系自己预计咁理想。
踏入社会，可能在任何岗位上都会有人钟意你，或者唔钟意你，无论点都好，喺呢一刻我觉得最重要系同自己交代，知道自己想点先系最重要。
体操教识咗我好多嘢，如果问我会唔会唔舍得，相信系一定会，因为体操喺我生命中好重要嘅一块版图，如果问我会唔会再拣多次，我答几多次我都会再次选择体操；如果问我满意呢26年既经历呢？我会用体操项目上嘅满分10分去形容。
做一样嘢唔难，但长时间坚持或者未必人人可做到，何况长时间坚持一样又闷又辛苦既动作就更难。不过再难再辛苦都总有佢嘅乐趣，心态决定你成唔成功，但态度可以决定你去到几高。
好多谢咁多年来，大家都留意体操运动，记得「石伟雄」、「石仔」，多谢你哋比我做过「体操王子」，希望大家继续支持我同留意体操运动，喺将来既所有范畴上，我都会继续努力，好快我会再喺唔同嘅岗位上继续帮助体操运动，同埋同大家见面，多谢。
容我如平时跳马比赛后，向大家举手致谢意🙋♂️，我，石伟雄，用26年完成香港运动员呢一「跳」，后会有期。
