黄仁勋可以被取代？ | 莫灏楠
发布时间：13:21 2026-11-13 HKT
坊间常有一种讲法：大型科技公司制度完善，冇咗边个都得，接班人一上，机器照行。放到Nvidia身上，呢句就过于轻松。市场将黄仁勋视为数万亿美元市值嘅Error，唔系因为佢只系一个高调CEO，而系因为佢根本唔系传统职业经理人。过去30年，总工程师、组织中枢、同台湾硬体供应链总调度，呢三个角色高度集中喺佢一个人身上，接班人好难直接复制。
扁平架构集权 一人拍板难替代
公司架构非常扁平，几乎以佢为核心。Nvidia不设营运长，亦冇传统事业群分权，约60至80名副总裁直接向佢汇报。佢极少同高管开一对一会议，战略拍板同技术争辩多数喺大群组公开进行，目的系减少资讯差同山头主义。员工每周要交「本周最重要5件事」，由佢亲自批阅，绕过层级掌握研发同客户动态。转身快，但亦代表公司缺少可以独立揸fit嘅人。因为职权集中，所以唔可以求其揾个人黎顶替佢。
产品上，佢唔只系门面，而系全栈总设计师。2006年力排众议，坚持每颗GPU内建CUDA，先至有今日AI软件护城河；2019年拍板收购Mellanox，将高速网络纳入核心。近年更把生意由卖单颗晶片，升级到卖整柜「AI工厂」，并打破业界两三年一循环，改走一年一更。呢种速度系优势，亦更绑死喺佢个人判断。少咗呢个拍板嘅人，节奏同方向都唔会自动延续。
Nvidia系fabless，算力霸权建基于同台积电近30年嘅关系，而且带有浓厚个人关系。早年公司陷困局时，黄仁勋向张忠谋求助，之后视对方为导师；而家喺魏哲家主政下，双方喺先进制程同先进封装上深度结盟。佢多次公开替台积电说话，认为贡献被低估、加价合理，换嚟产能紧张时较易获得优先支持。呢份信任，唔系一份普通采购合约。
对台湾伺服器同零部件厂，佢走嘅唔系高压压价，而系共同发财、重人情嘅共生模式。由显示卡年代行到而家嘅AI机柜，广达、鸿海、纬创、美超微、华硕等台厂，好多都系长期伙伴。高阶机柜结构极复杂，生产节奏又快，台厂愿意先行投入、赶工试错，有一部分系同老黄嘅关系。而要不厌其烦再讲一次，台湾而家几乎系世界最重要嘅AI硬件工厂。
话「冇话冇咗边个唔得」，字面听当然无问题，但有啲企业家太重要，就唔系一个system可以替代到。但Nvidia今日嘅护城河，有技术、有生态、有商业关系，亦有一部分写喺老黄身上。呢个模式令公司转得快、供应链够齐。投资Nvidia，唔只系睇晶片同AI需求，仲要睇呢套高度个人化嘅组织同供应链，有几难被复制。无错，好似Apple无左Steve Jobs都得，但已经唔系𠮶回事。就要重新pick up另一套system。当年Steve Jobs交棒比Tim Cook都有时间交接，而家老黄突然离职，都咪话唔烦。
元宇证券基金经理
莫灏楠
