姜涛首回应「我最喜爱」风波！爆花姐曾找他私下解释：唔系咁嘅意思 Anson Lo海边相惹讨论：系佢嘅生活
发布时间：13:42 2025-07-13 HKT
姜涛今日（13日）到尖沙咀出席服装活动，对于花姐早前指「我最喜爱」的奖项等于没有实力，由于姜涛与MIRROR过往亦曾获得过多次「我最喜爱」奖项，故惹来镜粉不满，直指花姐踩自己公司的艺人，姜涛指要帮花姐澄清，他指每个人也知道花姐是为他们好：「佢讲𠮶番说话系中间剪咗出嚟，可能有啲前文后语，代表佢唔系真系咁样嘅意思，因为佢嘅初心都系为我哋好。」
姜涛称花姐曾找他为事件进行解释
姜涛续指：「（断章取义？）我未睇过完整片段，但花姐都有特登揾我讲佢真系唔系咁嘅意思，话佢从来都冇谂乜嘢特别意思。」对于花姐的言论引起大家不满，姜涛即笑说：「小心啲喇咁样！其实我最担心系佢，佢因为照顾我哋都遭受好多言论，所以我哋都希望呢件事快啲完，其实系一件好小嘅事。」至于过往经常是否有被花姐叫「小心啲」？姜涛直言已过了被花姐话的年纪，现在只是被提点。
相关阅读：花姐指「攞我最喜爱奖即系冇实力」 姜涛与MIRROR曾夺同一奖项言论遭镜粉狂轰：王菲学友都冇实力？
今次活动有近千姜糖（粉丝暱称）到场支持，场面墟冚，更有警察维持秩序。活动于户外场地举行，现场气温超过30度，令一边玩游戏一边热到不停抹汗。姜涛受访时表示觉得今天好天气，但热好过淋雨，因事前一直担心天气状况。姜涛指平时会饮水及喷清凉喷雾消暑，但饮水就不会饮冻水，而是饮常温水，因冻水对肠胃不好，问到于会否游水消暑，他指夏天怕热所以不会游水，而冬天怕冻也不会游水，自己只会打波，又指昨日也有去打波。姜涛早前因头痛要食药，姜涛指已好返，谈到手上的伤势，他表示有点疤，但OK的，问到会否去做去疤疗程？他说：「男仔有啲疤冇乜所谓！」
对于卢觅雪在姜涛发生堕海事件后，于节目中指他「情绪冇问题，智商应该有啲问题」，姜涛坦言没留意太多：「公司叫我尽量唔好上网睇，惊影响我心情，所以我都冇乜太过留意，所有评论一定有佢嘅主观性，不过我哋都会用一个客观心态去睇自己。」姜涛又指跟卢觅雪不熟，有机会也想认识。至于对质疑他堕海的讲法，姜涛指正常，因为公众人物有很多被猜测和质疑的地方，自己也觉得合理，问到是否觉得委屈？他说：「过咗𠮶个年纪，唔会有咩委屈。（而家心理质素好好？）时间浸出嚟！」出事后毛舜筠曾以短讯慰问，姜涛表示好多谢对方，又谓其实有很多前辈也关心自己，也很感激他们：「因为呢件事我都睇到身边有好多人真系好关心我，所以我觉得系好事嚟嘅。」
另外，早前Anson Lo与队友一起食饭庆祝生日，但姜涛没有出席，他指当日要彩排，加上有自己的事情要忙着做，所以缺席，自己也很想去，但私底下也有跟对方讲生日快乐及有送生日蛋糕给对方，至于Anson Lo在姜涛堕海后贴出在海边的照片惹来讨论，姜涛表示那只是巧合，因为了解Anson Lo的人都会知道他喜欢在海边影相：「无论系呢件事之前定之后，呢个系佢嘅生活，所以我哋唔可以用呢啲嘢去质疑人哋有啲咩问题，（有冇唔开心或介意？）冇，过咗𠮶个介意嘅年纪，我而家系所有嘢都接受同埋睇开咗好多嘅年纪，唔系心理系心灵上。」
