75岁前《爱回家》男星征婚 首爆40年前因病离婚被抛弃 眼红李龙基想揾伴：性生活已经唔关我事
发布时间：13:10 2025-04-26 HKT
75岁填词人黎彼得曾在《爱·回家之开心速递》演「豹叔」，令他晚年再有代表作。不过近年他离开TVB后已甚少有演出，近年成为YouTuber于网上节目《玖噏秘笈》中评论大小事，曾因狠批多位后辈引起热话。黎彼得指自知说话易得罪人，因此最新一集《玖噏秘笈》不谈他人，改谈自己的私事，他更公开征婚，表示：「希望有个红颜知己、灵魂伴侣都好。」
黎彼得为曾嘲李龙基忘年恋道歉
黎彼得曾嘲李龙基与未婚妻Chris王青霞发展忘年恋，劝李龙基「屙笃尿照吓个样」，更提醒做人要有本钱及能力、人贵自知。但日前黎彼得在节目中向李龙基道歉，他说：「我同情佢多过指责佢，我本身同佢好多共通点，我哋都70几岁，无理由佢有件嘢执尾会，我又冇㗎嘛，自然会眼红啦……变咗咪五十步笑百步啰！」更指自己语气差，希望李龙基有怪莫怪，「同基哥讲句唔好意思，对唔住。」
相关阅读：75岁黎彼得被送入深切治疗部 肺花感呼吸困难 插尿喉要输两包血
黎彼得离婚40年突然公开征婚？
黎彼得单身40年：唔想负咗人
黎彼得在节目中分享想学李龙基找个伴侣，公开征婚。他表示离婚至今孤枕独眠逾40年，之前一直不想找伴侣是因为不想辜负别人。黎彼得说：「怕咗唔敢再揾，原因就系唔想负咗人，自己又冇七层楼……唔好讲阿基哥喇……总之照下块镜，凭咩再去揾另一半，因为而家嘅女人都系好需要男人支持，咁我当然想揾个有钱女人，但有钱女人点会钟意你老人家，个样又唔好，讲嘢又衰，好多时自己自量，要忏悔。」
相关阅读：黎彼得再度炮轰伍仲衡犯众憎！直认两人绝对陌生 因一事轰对方：自己知自己过去嘅事
黎彼得首公开40年前因病离婚
黎彼得曾表示早年错过真爱后，草草走入婚姻，最终结束3年婚姻，指前妻离家令儿子心理受到影响，他则成为带子洪郎。黎彼得在节目中公开40年前离婚的原因，「我当年病，好惨，久病床前……当时佢（老婆）试过揹我去睇医生，因为我腰骨生骨刺，连床都落唔到。咁如果你系一个女人，嫁着个老公仲要揹佢去睇跌打，男人最麻烦就系腰有事，咁我都唔想，但冇办法……𠮶轮又失业，点解？因为肝炎，个医生同我讲，唔好做嘢喇，因为你揾到钱都唔够医病。咁如果你系女人，你都下堂求去啦，点会陪住呢个老公，老伤病弱残。」
相关阅读：黎彼得突点名MIRROR连珠炮发：都唔系歌星嚟 三字形容伍仲衡狂焫火头
李龙基大谈性生活与王青霞一周行房「十几次」？
黎彼得入院半个月生找伴念头
黎彼得早前因流感入ICU深切治疗部，透露有肺花、呼吸困难等情况，留医半个月才出院。黎彼得因大病一场而心生找伴念头，他指看到很多病友都有亲友探望感羡慕：「点解我冇人嚟（探）呢？系……间中有个老友，但𠮶啲系老友，唔系爱人。我点解一个天煞孤星都冇亲戚朋友？朋友得一件半件啰，已经好好，但我觉得人哋嚟探病，我又孤苦伶仃……触景伤情，令自己觉得……唉……都唔好继续孤独啦，不如立下心志，而且70几（岁），我见基哥都可以执番件，我都有机会嘅，要求低啲都得挂？」黎彼得指年纪已经很大，过去做错的事不怕重提，他选择忏悔，「希望有个红颜知己、灵魂伴侣都好，性生活已经……Sorry喇，唔关我事喇，而家希望有个灵魂伴侣，对我呢啲孤独老人能够红袖添香，就算有咩头晕身㷫，有人照顾吓、煲啖汤你饮，冇得顶啦！如果两脚一伸，唔紧要，搞身后事啰！」
