古天乐右眼视网膜穿窿 惊觉有「飞蚊症」 眼科专科医生：可致永久失明
发布时间：16:17 2025-04-11 HKT
古天乐昨日（10日）出席在文化中心举行的「第四十九届香港国际电影节开幕典礼」，同场有日本影后安藤樱、廖子好、袁富华、导演中岛哲也和导演张吉安等等，作为焦点影人的古天乐戴上太阳眼镜示人，原来此举并非与「型」有关。
古天乐惊爆受眼疾所困
古天乐在访问中指近日受眼疾所困：「只眼系有啲问题，右眼视网膜穿咗两个窿！所以而家飞蚊症得好紧要、好多黑线飞嚟飞去，戴住眼镜将环境变黑就冇咁严重。」古天乐称目前正安排做手术：「手术前唔可以戴隐形眼镜；术后头一个礼拜要休养、又有段时间唔搭得飞机，都会影响到工作，所以而家仲安排紧时间。」
相关阅读：古天乐闻杜琪峰未放弃《黑社会3》计划︰我都想《星球大战》拍到18集 吁以港片景点推广旅游业达双赢局面
对于古天乐惊爆右眼视网膜「穿咗两个窿」兼出现飞蚊症，香港眼科医学院前院长、眼科专科医生周伯展接受《星岛头条》的访问，他说：「首先我哋要明白咩系视网膜，如果好简单嘅一个比喻，我哋眼睛系一个影相机呢，前面就有镜头，以前嘅影相机咪有菲林嘅，视网膜就等𠮶个菲林。𠮶个菲林穿咗窿问题就会渗咗啲水落去菲林底𠮶度，个菲林就可能会离咗位，我哋叫做视网膜脱落。当视网膜脱落、一离咗位之后，佢嘅营养就唔到啦，咁视网膜上便啲细胞就会坏死，即系等于个菲林走咗光咁，系一个好严重嘅病嚟嘅。」
周伯展医生坦言：「如果唔及时得到医治会永久失明，系严重㗎，所以要尽快睇医生，咁我哋帮佢点样做呢？如果佢未渗水、未脱落，剩系见到佢穿咗窿，我哋即刻用激光去修补，巩固返个视网膜，情况好似我哋贴墙纸，个墙纸有啲地方想甩啦，我哋呢落返啲胶水黐紧佢。」周伯展医生续说：「而家嘅激光好先进㗎喇，唔痛亦都冇辐射。到时候医生就会用显微镜睇住做啦，如果你穿咗两个窿，过程讲紧系几分钟或者一两个字左右，做完又唔使包住眼，就咁起身返屋企㗎。」
高危人士要定期check眼
但假如视网膜出现渗水和脱落的情况，周伯展医生情况变得麻烦，需要进行手术：「呢个情况剩系用激光未必得，通常都要做一个大手术㗎嘞，要将入面坏咗嘅组织，包括一个叫做用玻璃体嘅组织攞走，然后将个视网膜摆返去原来嘅位置，跟住再用激光去黐紧佢，咁攞走个玻璃体呢，我哋可能要返一啲物质去扶住个视网膜。呢啲物质可能系用气体，亦都可能用矽油（Silicone）嚟扶住个视网膜，呢个系一个大手术，可能需要一个钟先可以完成。」周伯展医生希望借着事件，呼吁大家预防胜于治疗：「因为未穿窿之前，我哋都可以查到系咪有呢个高危会穿窿，视网膜系咪薄咗啦，喺呢个时候用激光修补，所以呼吁啲高危人士要定期check眼。乜嘢叫做高危人士呢？除咗近视600度以上嘅人，三高人士，尤其系血糖高嘅糖尿病嘅人，如果佢已经叫糖尿上眼，就已经系高危啦，仲有又或者受过撞击嘅人。」
视网膜穿窿或者脱落其中一个征兆系飞蚊症
至于做完手术是否一劳永逸，不会出现复发？周伯展医生说：「穿过窿即系视网膜代表本身系弱嘅咁，今日你可能穿两个窿喺某一个位，听日你可以喺第2个位又穿一两个窿，所以定期都要check住架啦。咁我都提一提飞蚊症，视网膜穿窿或者脱落呢，其中一个征兆呢就系飞蚊症，如果发现佢突然间多咗飞蚊，要尽快揾眼科医生 check眼底嘞。另外个病征呢，就包括有闪光啦。好似有人帮你影相咁样，完全觉得无端端有闪光，好多时系从光嘅地方去暗嘅地方，入房𠮶一下就见到闪光，呢啲都系一个警号。」
相关阅读：九龙城寨之围城丨日本票房冲破2亿日圆 古天乐率领「城寨三子」赴日谢票 四字冧爆fans获欢呼拍掌
古天乐入行30年经过：
古天乐颈椎亦曾出现问题
古天乐一直都身体力行支持电影业，除了投资开戏外，还会担任演员，不时四出做宣传，即使身体出现问题，古天乐都坚持顶硬上。古天乐早年在电影《明日战记》中，与刘青云肩负保护地球责任，每次出动都要穿上重逾33磅的装甲打斗，结果古天乐的颈椎出现问题，他曾访问上表示起初他并不在意，没想到颈椎痛竟然让他整个右半身都麻痺了。古天乐完成工作后，立刻去医院动手术，将两节颈骨换成钛金属，不过他曾称痛到难以忍受：「医生问我痛到咩程度，由一至十级最痛，我话系十级，仲要系长期痛，痛𠮶时要食吗啡药止痛，瞓觉都转唔到身。」古天乐早年拍电影时也曾意外伤到眼睛，当时缝了8针，被医生叮咛眼睛以后不要见强光。
