李珊珊揭与钱嘉乐分手原因 想将百万后冠送往博物馆做集体回忆：唔通放喺棺材咩丨独家
发布时间：07:00 2025-02-25 HKT
47岁「传奇港姐」李珊珊20年前突然在娱圈「玩消失」，直至2017年证实患上惊恐症。最近珊珊终于战胜病患「复出」幕前，为自资的网上平台《三坐山Mount Trio》做主持，不过，神隐近8年的她身形暴胀，虽然没有了昔日的36E曲线美，但珊珊唔care外表，坚持(嚿屎)旧事已冲走了，亦不留恋港姐光环，甚至继续争取将当年价值138万的后冠做慈善拍卖，再唔成事的话，日后就会捐给香港文物博物馆做集体回忆，坦言：「留嚟做乜呀？唔通放喺棺材咩？」
李珊珊因惊恐症、湿疹、甲状腺问题停工
18岁的李珊珊当选港姐冠军兼夺「最上镜小姐」、「最受传播媒介欢迎奖」及「才艺小姐」，更被封为「史上身材最好的港姐」，曾出过两本写真集。2005年穿上蛇皮性感泳衣拍纤体广告，震撼度更成为热话。近年珊珊受到惊恐症、湿疹甲状腺低问题困扰停工，几经辛苦才企返起身走出幕前。
李珊珊可控范围内做节目
今次李珊珊投资了多过5位数字经营集销售、推广、直播的多功能平台，好有挑战性：「患病期间收埋自己7年，期间会追睇YouTube 节目，觉得好啱自己发挥，喺可控范围内有信心、想做嘅嘢，尤其《神医请坐》由治疗我7年嘅精神科专科医生主讲，所以好有温度，希望令有情绪病人及照顾者有更多认知，甚至唔识嘅人会有更多了解，而唔系随意安慰两句『坚强啲』『睇开啲』『谂多咗』，呢啲帮唔到件事反而有反效果。」
李珊珊揾到方法跟病共存
当日病发时她会肚屙、喷射式呕吐、标冷汗、呼吸困难、休克、心跳加速，感觉似临死边缘，几年后也曾鼓起勇气想行出来几次，可是总会有沙石及障阻：「试过跑步keep fit跑裂咗条脚筋要休息3个月，咁样畀嘢挡一挡令我好沮丧，𠵱家目标清晰就算爆屎渠一身屎，最多缩一缩都会向前行，唔会再畀佢玩我！虽然𠵱家外出仲系好惊，惊恐时会肚屙，但揾到共存唔影响到工作嘅方法，肚屙咪去公司隔篱嘅厕所，个厕所又干净用得安心…」问到健康状况？她表示已减了8成药份，覆诊期由一周一次延至一个月，唯一因为甲状腺低令体重不可控：「我只可以讲，我会好努力咁工作及生活，呢个角度想畀大家睇到，『今日嘅我唔等于明日嘅我』，我会好好成长，大家慢慢睇，以前点fit，过咗去就系过咗去啦，人生好似一本书，𠵱家本书多咗几页，要怀缅可以上互联网睇，否则我招呼唔到。」为了营运公司，她以健康放在首位，已戒冻饮戒烟。
李珊珊谈与钱嘉乐分手原因
李珊珊不多留恋昔日4料港姐光环：「留恋嚟做乜呀？去印度种蕉呀？不过，都多谢帝国时代嘅香港小姐深受尊重，每次出去有好待遇，不时参与慈善活动。」9年前珊珊趁住当选港姐20年纪念日，曾宣布义卖港姐后冠做慈善，最终因牌照问题不成事，时至今日她意愿不变：「我冇打开个盒超过20年，唔会用㗎喇！咁留嚟做乜呀？唔通放喺棺材咩？后冠唔会跟到我身，加埋4个心口针及权杖好大盒㗎，所以交咗畀阿妈放喺保险箱保管！」珊珊甚至构思下个方案，如果再拍卖唔到，日后就会捐给香港文物博物馆：「唔通抵押咩？相对捐去博物馆有意思得多，大家可以睇返代表上世纪香港嘅港姐后冠款式。」珊珊送出后冠不觉可惜：「呢啲系身外物，就算有咩不幸，佢哋争饱佢，钟意边个就去拎唔关我事，朋友都可以拎埋一份，最重要唔好打交。因为一日港姐一世港姐，唔使靠呢啲留为纪念！」
另外，不婚主义的她冇拖拍3年，珊珊承认曾少年轻狂直认花心，好需要谈恋爱的人：「我话冇少年轻狂就呃人啦，甚至有重叠过，但全部真心真意去爱并不欺场！」她反而庆幸有呢个经验：「唔通临老入花丛咩？人生3大遗憾事系少年得志、中年失业、临老入花丛！起码呢个阶段唔会中招，至少知道自己需要啲乜，要好好活好呢世就得，唔好谂咁多，𠵱家要有涟漪先行第2步，会好好享受过程『你在选择人；人亦能选择你！』」重提当年跟钱嘉乐分手原因，珊珊开腔说：「大家都冇计划，不知不觉就8年，缘份到尽头就完，但人哋一家幸福也不用再提。(有冇后悔？)点解要后悔？情爱嘅嘢好难讲。」重新出发的珊珊少咗包袱，甚至在节目中会不小心爆粗，乐得轻松自在。
采访：方骞平
摄影：林宾尼
化妆、发型：阿宝(ig：abc_ahbochan)
场地：三坐山
