游飚专访丨「TVB御用烂仔」由时薪$3临记挨逾20年变老板 疫情后公司面临倒闭：下次见我可能冚咗旗

现年56岁有「TVB御用烂仔」之称的游飚，人生跑道荆棘满途。他中三毕业便应征临时演员，曾经渴望成为演员的他，由日薪3元的临记，慢慢成为电视台月薪一万多元的演员；自2004年起，他开始转换跑道开设「除甲醛」公司，一路走来起起跌跌，曾经高峰过，如今公司又再次面临危机。游飚接受《星岛头条》访问时笑言：「可能你下次揾我访问时会问，游飚你冚咗旗㖞！你嚟紧点生活呀！哈哈！」

游飚初入行见发哥狂飙汗

游飚笑言自己当年中三毕业看到聘请临记演员的广告而入行，虽然如今回头看笑言是「被坤入行」，但他娓娓道来自己的演员路时，仍是笑容满面。「𠮶时𡃁仔唔识嘢，其实系畀人坤咗入行，我哋拍电影拍咗十几个钟都系40蚊咋！」游飚处男作是张国荣、张曼玉与梅艳芳主演的电影《缘份》，接住又参演《等待黎明》，当时他有幸见到周润发和万梓良，「见到发哥、万子，紧张到真系出汗㗎！（𠮶阵）喺西贡码头，成个海边放满车軚喺度烧，因为拍打仗，𠮶时未知啲黑烟有毒，返屋企冲凉发现，哗！洗头啲水、鼻冲出嚟啲水、冲凉啲水全部黑色，好惊！几年后我先知，原来烧车軚系有毒，想当年，要大烟（效果）都系揾两个车軚系咁烧，咁就烽烟四起喇！当然后尾唔再用，但我都已经吸咗好多，好庆幸未死！哈哈！」

相关阅读：「TVB御用烂仔」游飇罕现身谈辛酸史 曾难以抽离想周街打人 淡出多年变老板

游飚为悭钱 广播道行去深水埗

游飚初入行当了6年的临时演员，日薪40元，但他当时住在元朗，工资不高的他，倘遇凌晨收工便用奇招节省车费。「就算我之后去咗电视台做临时演员，最早期亚视系30蚊十个钟，TVB系35蚊十个钟，梗系做TVB啦！亚视真系（人工）低之余，仲要个服装间都几臭吓！𠮶时我哋喺总台广播道凌晨收工，佢出粮畀咗35蚊，我惟有由广播道行去窝打老道，然后再行去太子道。因为金鱼街凌晨5点就开，喺𠮶度公园瞌阵，然后再行去深水埗同师傅饮茶，未够9点就喺酒楼扮饮早茶，其实嗌完两笼嘢之后就瞓到9点钟醒，系要咁样悭钱㗎！饮茶系师傅畀钱，阴公！我哋都系最低层挨出嚟！」

游飚首讲对白震过猫王

游飚首次讲对白是1986年拍TVB剧集《林冲》，他忆述当时突然被指示要「讲对白」，剧情讲述他要面对饰演40万禁军教头林冲的演员高雄说对白，他笑言自己当刻「震过猫王」：「好彩𠮶时啲兵有裙盘，因为我对脚系不受控制咁震，第一次吖嘛，现场过百人，高雄哥同我讲：『唔使惊，冷静啲！』我𠮶吓更加惊，但经历完𠮶次之后，我就有个决心，下次我要一take OK！」之后游飚再有机会讲对白，他亦如愿成功一take过，更获收音阿头大赞「咁好戏嘅」。

游飚为做好演员不怕死

游飚自小渴望成为演员，所以他从临时演员做起，即使当年工作人员要求他从高处跃下，就算惊都照做，希望装备好自己后去考艺员训练班成为演员。「𠮶时觉得演员高人一等，连梳头、化妆、服装（工作人员）都好尊重你，起码唔会嗌XXX过嚟梳头，佢哋有独立嘅车坐，演员好犀利呀！」游飚以此为目标努力向上，由月薪千多元到后来加薪至三千多元，由于当时未有最低工资，因此收入跟不上社会趋势亦是常事，「咁自己好钟意做都唔介意辛苦啲，啱我嘅性格，每日都有唔同嘅挑战，我哋就算落雨等埋位都好开心㗎！」

相关阅读：TVB绿叶离巢后愈来愈富贵？御用OL变年薪百万女强人 御用法官转行做保安

游飚是「TVB御用烂仔」？ 

游飚工资低仍可储起半份人工

在当临记那6年里，游飚虽然人工低，但开支不多，每月可以储起半份人工，「𠮶阵日日（朝早）6点做到翌日清晨清6点，日以继夜系咁做，冇机会使钱，衫又着嚟着去都系𠮶几件，最多系食饭或者买包烟仔，都系4蚊，应酬就更加冇啦！」

游飚其后签约TVB成为演员，但想像往往与现实有落差，笑言曾经遇过「不人道」对待。「我哋唔可以要求人哋对你态度好啲，而家谂返转头，如果我当时自己做到某个高位时，人哋点会咁嘅态度对你吖！人哋点敢屈你吖！点解咁样去玩你吖！」游飚续说：「唔系电视台特别啲，系成个商业社会又好，某间公司都好都系咁，所以由做戏嚟到做生意，发现其实商业社会同电视台，都系唔容易做到成绩。」

游飚拒转行：渴望做好一个角色

游飚透露，当年跟TVB每两年倾一次合约时，但加薪不多。当年的他人工低，家人多次反对，甚至被要求转行，但当时游飚坚持继续做，但他认为自己为的不是发明星梦，「其实系想多啲机会去演戏，做唔做到明星系题外话，我都知自己唔系咩明星嘅材料，虽然我唔系一个合格嘅演员，但系我好渴望去做好一个角色，我都问过自己，想唔想继续拍戏？我系好想，但好似个环境各方面呢啲外来因素，唔系咁容易，因为成个时代变咗。」

游飚寻找新出路

至九十年代尾，游飚看到一个又一个中年演员突然「消失」，当时的他年仅廿多岁便要黐须扮年老「大臣」，当时的他开始意识到演员路有危机，开始要找寻新出路。「我𠮶时谂，如果电视台突然唔要我，我食咩呢？惊㗎！所以我去到九几年尾开始有做配音，去学习，做多啲唔同行业，我哋喺出面寻觅紧其他嘢，你唔学多啲嘢，点会有出路呢？我以前成日讲一样嘢，我哋成日喺电视台，收工就返屋企，我哋接触返行内嘅人，如果你永远唔去接触商界，你永远会困喺呢个地方，你要踏出一只脚落商业社会，不求回报去学习，你先可能有啲机会，我庆幸遇到一个机会，有个老板去创立呢间公司，佢觉得，啊，呢个游飚几傻㖞！虽然咁蠢，又几肯做。」

游飚成立除甲醛公司 由两张枱开始

至2004年，游飚与数名拍档成立除甲醛公司，他忆述当时在商厦以月租1400元租下一间房，内里有两张写字枱，但以他当时的收入，连缴付租金都有困难。「1400蚊一个月其实已经好平，虽然只摆得两张写字枱，当你冇钱交时，点样去解决呢？𠮶时我哋唔需要人工，因为我喺TVB仲出紧粮，够养活自己，只不过要解决公司问题，一步步去发展，呢个故事太沉长。」

游飚指后来开始求变，与其他公司合作推出新的抽油烟机，慢慢做出口碑。「𠮶阵唔敢讲上咗轨道，但多咗好多公司同我哋合作，都系自己尽能力，我哋希望喺个行内嘅窿窿隙隙生存到，唔好讲赚大钱，能够令到公司生存，已经唔容易。」

游飚：「要别人相信你，要付出好大努力」

游飚认为，做演员和做生意一样，导演或客户为何要选择他？他笑称自己是全港第一个做除甲醛，至今已经第16年。「好多人以为除甲醛嘅公司就系间间做嘅嘢一样。我哋公司跟日本标准做法，做得好彻底好仔细，当然价钱系贵，有冇人欣赏，呢个系困难嘅。同电视台有个游𩙪一样，我点样令到人哋去用我，其实我尽咗力之后，有啲嘢我比较难控制，系咪真系你做好一件事，人哋就会用你呢？原来喺商业社会唔系嘅，我都学习紧，而家做生意比起以前电视台个挑战性更加大，个世界更加阔。但唔好意思，1加1唔系等于2，我要解决好多难题。产品好，得我知，你唔知，我讲句好，你唔会信，等于出面街客『你讲就系㗎喇！』你点样令一个拒绝你嘅人去相信你讲嘅嘢，需要付出好大嘅努力。」他说。

游飚生意面临危机 乐观面对

游飚的生意路，挨过一关又一关。2004年，他由两张枱做起；2021年，公司生意上轨道，员工共有6人，他当时在土瓜湾工厦租用千呎单位，但疫情过后，如今公司员工只剩4名。他坦言公司现时面临倒闭危机，「依家公司都系一个危险嘅状况，我希望能够转危为机，可能你下次揾我访问嘅时候会话，游飚你冚咗旗㖞！你嚟紧点生活呀！哈哈……其实呢一关唔容易㗎！希望未来有个转变，令到公司可以继续生存！」

对于现时公司是否收支平衡，游飚欲言又止，「我谂呢方面唔好去谂，系绝对唔容易，希望政府对我哋中小企真系有啲支持，令我哋过到呢个难关，我哋唔系想借钱唔还嘅人，只系好想过到呢关！」

游飚是谁？

游飚是前TVB绿叶演员，他1989年投考第三期艺员训练班，翌年毕业加入TVB，于2012年与TVB结束21年的关系，期间他曾参与拍摄逾一百部剧集，《大时代》一人分饰七、八个角色令人深刻，他自己最有成功感的是《天子屠龙》，饰演傲拜（林嘉华饰演）个大仔纳穆福，「虽然我得5、6集嘅戏，后尾畀老豆杀咗啦！都几满足㗎！我哋去到七圣庙，场场戏都有我份，因为我要杀人放火，呢啲衰仔富二代。另外《封神榜》做太子殷郊，郑子诚做我爸爸，所以我见亲郑子诚都嗌爸爸，《搜神传》做水鬼杜三，添哥（李添胜）畀咗好多机会我，呢个水鬼唔易做，因为我系唔识游水，要潜喺水底讲对白，我有去问添哥，『唔怕，有人会救你，唔系好深咋！』」

采访：林碧洋

摄影：罗安强