方太现身《流行都市》大爆当年教煮餸秘闻曾与安德尊合作称赞后生好乖又照顾人

更新时间：21:00 2023-12-23 HKT
发布时间：21:00 2023-12-23 HKT

被誉为香港「烹饪界始祖阿妈」的方太（方任利莎），从70年代末在妇女节目大显身手，到80、90年代更担大旗主持《方太生活广场》等节目，形象深入民心。TVB妇女节目《流行都市》邀请89岁的方太亮相节目，虽然她当年一直效力亚视，但激罕现身TVB节目，当不少观众感到惊喜，方太更在节目中大爆当年在节目上直播烹饪过程的秘闻。

【相关阅读】：89岁方太激罕出山精灵拍广告！仍然热爱烹饪每周行街市两次扫货

【点击睇方太亮相《流行都市》】：

方太现身节目时向主持安德尊（大王）及姚嘉妮先戴高帽，之后谈到近况时，方太语带轻松表示：「我冇做嘢，可以讲半退休，我做我自己啲嘢啦，平常生活。」安德尊问到怎样平常时，方太打趣道：「你学唔到，你仲后生，我唔系太晏起身，我早起身嘅，（咩钟数呀？）7点几啦！起身之后食早餐啦！睇吓今日有啲咩做下啦！或者见吓朋友，喺屋企自己ＭＥ摸吓啦，系咁架喇！」更表示有睇《流行都市》。

之后提到方太养了16年的爱猫「嘉嘉」，姚嘉妮一度误会是讲自己，方太之后又再赞主持姚嘉妮：「靓女就钟意佢（姚嘉妮）啦」，之后才续说：「嘉嘉好乖㗎，佢有自己嘅生活，（佢唔骚扰你？）系啦！（陪你？）会啦！佢有佢自己一套啰，最紧要系我细女（阿宝）钟意佢。」

方太忘记入行年份

被问到从何时起开始教煮餸时，方太直言不太记得：「我头先都同个女讲，我都唔记得，好似99年」，原来方太从1979年加入节目主持烹饪环节，谈到当时的趣事，方太自揭第一次作现场直播时好紧张，更发生放送事故：「第一次就好紧张啦！第一次上电视梗系紧张啦！谁不知挞唔著火，喺节目之前我有挞过，著火嘅，到我煮餸嘅时候冇喇！原来系最后一啖气呀，之后同观众讲，真系唔好意思喇！今次系我第一次上电视，居然挞唔著，不如我依家用口讲点煮呢个餸啦，咁挨咗10分钟度啦。冇得落台，出紧街呀，所以返到去我烹饪学校，俾我老板闹我啰，佢睇紧嘛，谂住你第一次上电视，见咁样咪闹我啰，『你有冇搞错呀？你搞乜鬼呀』。」

安德尊爆方太禁入厨房

其后有报章为方太讲好说话，她忆起当年道：「当年好得意，有张报纸第二日就话㖊日电视有个新面孔，但佢挞唔著火，不过佢都好淡定，希望大家畀啲机会佢啦！我心中真系好感激，唔知佢系边个，真系好喇！」安德尊曾与方太合作，他指当年方太不容许其他人入厨房或掂任何嘢，不过方太就称赞安德尊说：「佢好乖，佢好合作好照顾人，当时做呢个烹饪节目好多人，我𠮶阵时有个要求，我自己一个人做我就做，如果好多人我就唔做，你系上嚟介绍煮餸丫嘛，呢个𠮶个好似好乱。」

【点击睇方太生活照】：

当年曾推出烹饪书的方太，透露试过一日煮30个餸：「𠮶个系影杂志，其实你唔使真系煮熟，因为你影相丫嘛，但你要俾人睇到系煮熟嘅，（谂30个餸唔重复好伤脑筋！）比较系会麻烦啲嘅。」她估计多年来煮过逾千道菜色，不过自己未有统计，更笑言：「我有钱收就得喇！」对于教煮餸的秘诀，方太坦言没甚么秘诀：「唔好觉得呢个餸净系我识煮，你唔识煮，我话好食就得喇，你要教识对方煮丫嘛，你要教识对方觉得好食先得嘛，唔好净系以自己做标准，（跟食谱就做得到？）系呀，我写食谱嘅时候，我唔单止试过啦，同时我以对方嘅角度嚟写嘅，我钟意食咸啲嘅，大家食呢个口味啱唔啱啰。」为配合港人口味，方太会将菜色作改良，因应港人口味。

对于做烹饪主持要具备的条件，方太认为要起码识分生定熟，而自己更收藏有100条围裙，不过已将部分送给别人。对于给予晚辈的忠告，方太打趣指安德尊不下厨，没有事需要留意。而她的口味比较清淡，亦喜欢食水果，方太笑说：「我同我细女成日讲笑，我希望做一只有钱嘅马骝，有钱马骝自己去买丫嘛。」

方太谈家人相处之道

被问到与家人的相处之道，方太表示：「我又唔敢讲我系标准啦！我只可以讲我嘅方法啦，我同啲仔女就好似朋友一样，佢哋细个𠮶阵时就唔同啦，你要管教佢啦，我比较严啲㗎，但有嘢可以商量，朋友一样可以大家商量，到咗佢哋出嚟做嘢，咁更加好似朋友一样啦，我记得我个仔初初出嚟做嘢𠮶阵时，佢会讲公司啲嘢俾我听，𠮶时我都做嘢嘛，有一日我好攰，佢讲到11点几12点，我同佢讲『阿仔听日先讲好唔好呀？』我实在好眼瞓。」其细女更陪伴在侧，如经理人一样照顾。