星8卦丨「靓声」防疫大阵仗全方位保护奇招开工免家人中招

更新时间：10:00 2023-06-02 HKT
发布时间：10:00 2023-06-02 HKT

自从通关后，一众歌手纷纷在不同地方举行演唱会，搏老命揾番之前错过咗嘅机会。好似「靓声」最近去咗隔离埠揾真银，由于抗疫得力，一家大细连工人都未中过招，所以开工时格外谨慎，同「师弟」唔同嘅系，佢好等钱驶，北上虽然心惊惊，但无人可以抗拒金钱诱惑。「师弟」仲夸张，唔好话北上，连街都唔俾老婆仔女出，但几小心都终于失守，之后佢好似放监咁周围去，直情逢请必到。

「靓声」都好为自己一家人咁努力而自豪㗎，所以无论北上定过大海，出镜前佢一定着晒全身保护衣，连手袜都戴埋，慌死啲菌沾上身。好似啲食物送到自己手上之前，佢要助手全部消过毒至可以送入房，唯一可以近距离埋身就只得发型同化粧，但亦都要佢哋着晒保护衣，因为自己梳头化粧无得着保护衣，咪叫人哋着，以策一万个安全。

然后每晚同嘉宾影相，「靓声」都拣过度过，觉得对方成日周街wet嘅就咪埋嚟，通常佢拣啲有钱阿太合照，因为觉得呢班人比较锡身。「靓声」平时同「大食」好鬼friend，但疫情期间一次面都唔肯见，无非系知道佢同班朋友夜夜笙歌，为咗咁样「大食」都有微言，话佢顾住啲仔女就唔理朋友。咁又真系情有可原噃，「大食」啲细路大晒梗系无有怕，「靓声」几个仲读紧小学，今次真系难为了爸爸！