星8卦丨「模姐」嫁外省仔图做归家娘计错数继续被有钱人包养

更新时间：10:00 2023-05-05 HKT
发布时间：10:00 2023-05-05 HKT

有时啲嘢唔好睇表面，尤其系娱乐圈，讲下「模姐」呢位表面好幸福嘅人妻，当日错爱「舞王」拖足十几年都唔肯成家，「模姐」都无所谓，因为后期见到势色唔对，抱住骑牛揾马心态希望有好下场。

可惜最终分手系因为丑闻，搞到「模姐」仲要顾全颜面而唔敢即刻了断关系。回复单身嘅「模姐」好搏，咁多年都得到一位有顽疾嘅「有钱人」照顾，除咗外相有问题，有钱人嘅老婆同二奶都好辣，「模姐」因为有型又靓女，高高瘦瘦好得有钱人欢心，所以好想成世包养佢。「模姐」明知系无结果，加上有钱人啲特殊廦好，令佢一直都想揾到好码头就分开，似番个正常人。

遇到「外省仔」时，「模姐」以为得到幸运之神眷顾，睇表面屋企有底，出身唔错又见得人，唔驶半年就大埋肚，今次以为可以做贤妻良母，有钱人亦送上大礼贺佢结婚。点知嫁咗几个月至知，「外省仔」虚有其表，老豆嘅家族已经无晒钱，佢亦希望借助「模姐」嘅名气令自己有番啲生意。

贫贱夫妻百事哀，「模姐」要养老公同仔，唔驶一年就要揾番「有钱人」，「有钱人」一早知男家唔掂，由得「模姐」去嫁，无非都系等佢返转头，咁样至可以令佢一世都飞唔甩，继续被包养。