港闻

娱乐

最Hit

即时

中国

国际

星岛申诉王

财经

地产

生活

健康

教育

体育

大湾区

专栏

马经

PLUS

头条独家丨马国明心情靓热爆拍外景系咁笑忙拍剧无暇结婚诗咏神回有假就得

即时娱乐

更新时间：13:50 2021-11-11 HKT
发布时间：22:15 2021-11-10 HKT

有薪假期唐诗咏指马国明𠵱家最需要假期，马明顺势要求公司畀有薪假期。

「安心事件」发生近3年，47岁马国明做咗受保护嘅「马明BB」，去年跟34岁汤洛雯公开恋情获全城祝福，拍拖以来屡传好事近，最近再传马国明已向某国际品牌订制婚戒预备结婚。正拍摄文伟鸿监制新剧《隐形战队》的马明避谈婚讯，但心情好好，连印汗都系咁笑！马明虽然封嘴唔回应，不过「好兄弟」唐诗咏唔觉意讲出重点：「𠵱家最重要系假期！」马明大笑和应：「畀个有薪假期我会谂谂！」采访：方骞平摄影：沈健程

制作认真马国明喺沙田闹市拍摄一场枪战戏，现场制作认真，监制亲自指导。

印汗都笑工作人员帮马国明印汗，心情好好嘅佢系咁笑。

上周六朝早，马国明与唐诗咏在沙田闹市，为TVB新剧《隐形战队》拍摄一场枪战重头戏，剧情讲两人跟恐怖份子头目黎泽恩（组合MR成员Ronny）喺马路上驳火，当中有爆破镜头。以真枪上阵嘅马国明及Ronny全程有军火专家傍实，每次持枪前都要由专家确定安全。

肉紧卖力拍得顺利

当日虽然晨咁早开工，而且天气回暖，着住长袖外套拍动作镜头嘅马国明热到系咁流汗，睇见佢都辛苦，但马国明精神奕奕，心情大靓，不论同工作人员交谈、跟路人影相、连补妆、甚至印汗都系咁笑。埋位时就全程投入，肉紧到青筋都现埋，相当落力，因为NG唔多，拍得好顺畅。马明形容系拍剧以来，最多动作戏嘅一套作品：「拍动作戏都辛苦㗎！反而拍枪战场口好玩得多，尤其系男仔钟意开枪。由于系用冇弹头嘅真枪，枪口只系会有火，喺香港拍枪战戏都安全嘅，唔会有蛊惑的枪(女友知唔知拍真枪戏？)又唔使同佢讲，佢只系知我拍动作戏。」

积极瘦身「靓汤」正积极瘦身，被指同马明好事近。

望快啲完只想快啲拍完套剧嘅马国明，一埋位就相当用心。

诗咏爆最需要假期

问到系咪好想快啲拍完《隐》剧有时间成家立室？马明说：「梗唔系啦，我冇假放呀！因为紧接又要拍下个新剧《法言人》，大概要拍到明年3至4月呀！ (系咪公司临时通知？)系近排接到通知嘅。」当问到是否订制婚戒赶做明年5月新郎及与「靓汤」搬去将军澳新居试婚等问题时，他即以埋位拍戏简短回应：「传闻啫！传闻啰！有好消息我哋会讲。」问唐诗咏想唔想快啲见到马明「做老衬」？她大笑说：「我只系想佢今日快啲收工，我就可以快啲开工，其实佢都要嗱嗱声拍完套戏先有时间(结婚)。」马明即补充话紧接有新剧拍，唐诗咏笑住爆响口：「又唔一定要拍完套剧，都有好多方法嘅，𠵱家最重要系假期。」马明附和自爆说：「系呀！畀个假期我会谂吓，不过𠵱家冇假期。(同公司争取吓啦！)咁你帮我写出嚟，叫公司畀个假期我，但要照出粮嘅(编按:艺人只计骚或包薪)，哈哈哈哈！」