头条独家丨张继聪周秀娜谈《马达·莲娜》:拍到接近死亡 8°C挨冷吹风的士亲热撞到周身瘀

更新时间：15:52 2021-10-13 HKT
发布时间：23:45 2021-10-12 HKT

两人提起挨冻拍摄的情况，Chrissie自然做番保暖动作，阿聪就讲到手舞足蹈。

唔讲周秀娜（Chrissie）同张继聪都唔觉，原来已在9部电影中合作，直到最近在《马达·莲娜》演两个可怜虫爱情故事，才算真正认识，而今次阿聪唔再搞笑成功转戏路，要感激有古天乐这个黄大仙保佑。电影全程在澳门拍摄，两人一场的士亲热戏，Chrissie既要施展软骨功撞到周身瘀，更要在8°C低温下拍摄，两人形容有种接近死亡感觉，幸好电影已获多个影展垂青，辛苦都值得，两人更睇好对方有机会夺奖。撰文：杜杜摄影：叶君海发型：Heibie Mok @Hair&Culture(Chrissie) 化妆：Circle Cheung (ndnco.co)(Chrissie)、PinkyKu 服饰：ba&sh、Giuseppe Zanotti、BVLGARI(Chrissie) 场地：富卫1881公馆

Chrissie的戏份大部份都好少布，不用埋位即包实保暖。

转投新经理人公司的Chrissie，望拍摄更多不同类型电影。

以往多次跟阿聪合作，Chrissie觉得对今次演出有好大帮助，「呢套戏就系讲『马达』同『莲娜』两个人关系，跨越咗好长时间，要咁短时间浓缩拍呢段关系，好彩我哋之前有合作过，唔会话惊尴尬，唔会再去建立呢个信任。」

古天乐似黄大仙

阿聪今次成功转型不再搞笑，他要多谢似足黄大仙的古天乐，「我加入古仔公司后，我就同佢讲想试另一啲戏路，比较认真啲嘅戏，佢有一日打畀我话有个project想我做，同Chrissie拍，睇完剧本后，哗！正㖞！咁体贴嘅，话有就有，果然系黄大仙咁，古仔佢真系好好，我哋同导演倾咗几个月剧本，古仔都系一齐畀意见去调整，多谢古仔同导演畀我拍同信任我，通常啲导演揾我搞吓笑，可以做到喜剧演员梗系开心，但最大件事你唔系搞紧笑，人哋都觉得你好好笑，摆脱唔到，你睇
Chrissie睇住我都成日笑。」

Chrissie与阿聪戏中不乏亲热戏份，特别是一场的士内的激情戏，阿聪认为并非卖弄色情而是必需，「呢个系一段关系里面好亲密嘅语言，希望做到呢种亲密感，表面上唔浪漫，但对于呢两个可怜虫系最浪漫时刻。」而在窄小的澳门的士内拍更难，阿聪说：「好彩佢啲筋比较松，可以折埋成个人，最初导演话喺后座拍，我睇吓个后座，脚都唔系好摆到，点拍呀！？（Chrissie：所以每次我都会撞到，拍呢部戏全身都有受伤咁）系呀！身心都受伤。（Chrissie：瘀晒呀！个头又撞到呀！）佢都好惨。」

阿聪好开心公司有种倾电影的文化，一见面就倾。

电影在疫情下拍摄，两人趁空档漫游不一样的澳门。

睇好对方得奖

另一个难题是天气只有8、9°C，场地还要在海边，工作人员个个包到只粽，反而Chrissie和阿聪着好少，Chrissie完全唔想离开架车，「一cut就即刻开暖气。（聪：我哋开到亚热带咁，开到30度，开爆机，去到灼热咁样。）哈哈！系呀，配合番剧情！」两人透露原来好多场戏都挨住冻拍，仲试过好接近死亡，阿聪说：「有场我哋睇日出，拍完亲热戏紧接落去拍，临天光最冻，风又大，仲要着短裤、拖鞋，佢就着旗袍，同埋拍摄个位系好危险，啲工作人员唔可以攞住啲衫埋去，又要就日出拍得好快，𠮶刻真系好接受死亡，拍完返去酒店浸咗半个钟热水，好惊病。（Chrissie：返去第一时间冲凉，狂浸热水，唔系冇知觉）当自己杯面咁。」

谈到电影入围《金马创投会议》、意大利《远东国际电影节》竞赛单元及日本《日出国际映画祭》竞赛电影外，更成为《香港亚洲电影节2021》开幕电影，获各大影展垂青会否有信心冲击奖项，Chrissie和阿聪即互笠高帽话对对方得奖有信心。阿聪说：「做人有冲击梗系好啦！梗系要冲击吓啦！（Chrissie：做人要畀啲挑战自己）今次真系好幸运，讲真我哋做演员尽咗力拍，票房又好，去到影展又好，有好多主观嘢唔系我哋控制到，我哋尽咗责任去拍，真系拍到咩肉都割晒出嚟，有啲位再唔cut晕畀你睇，所以都几开心去到影展，（Chrissie：系我哋预想之外嘅嘢）起码证明我哋咁样做有人识欣赏。」而《远东国际电影节》主席Sabrina Baracetti更对电影作高度评价，形容Chrissie的演出「令人心碎」。最近转投新经理人公司的Chrissie，未来目标会否放在奖项上，她说：「我又真系冇话要攞一个奖喺手，但系个个都想攞系咪先！（阿聪：唔好攞一个攞两三个）我自己拍戏最开心最享受，就系梗系佢（观众）感受得到我拍嘅时候嘅感受，因为我拍嘅时候真系好心碎，呢样嘢系最开心。」