港闻

娱乐

最Hit

即时

中国

国际

星岛申诉王

财经

地产

生活

健康

教育

体育

大湾区

专栏

马经

PLUS

头条独家丨林作投诉狂改规则唔俾戴头盔大战前夕形容钟培生系芝娃娃

即时娱乐

更新时间：14:39 2021-09-17 HKT
发布时间：21:45 2021-09-16 HKT

愈战愈勇林作愈战愈勇，虽不满钟培生改赛例但完全唔惊。

全城触目嘅《培生擂台：无敌杯We Are Champs 2021》后天(周六)举行，决战前夕，林作和教练向柏荣公开投诉钟培生不停搬龙门打茅波，就拳手装备、休息时间等问题，由口头协议到合约条文改完又改，好混乱，直认会影响到连串针对性策略，尤其突然话唔畀戴头盔好危险。对此。钟培生懒得理林作：「冇回应啦！希望大家准时入场睇比赛。」采访：方骞平摄影：沈健程场地：荣拳馆

改变打法因为临时唔准戴头盔上场，惟有改变打法，师傅教林作好好保护个头。

畀佢玩晒林作及向师傅投诉钟培生嘅拳赛系咁改变赛例，觉得唔公平。

打咗3年拳击嘅百亿富三代钟培生（Derek），用一百万酬金嚟迎战仅学咗半年拳击嘅林作，两人未上擂台系咁打口水战。最新有钟培生在fb出post：「林作，早晨，有冇兴趣加码？如果我K.O.咗你，扣30万出场费。如果K.O.唔到，畀多1,000,000你。」不过林作只系回佢PM详谈，大战前选择同女友裕美去游船河轻松吓。

操肌展现老鼠仔

本周一，林作去拳馆作最后冲刺，除咗踩上擂台同向师傅对打外，仲用凶狠凌厉嘅眼神狂打沙包发泄，更喃喃自语说：「钟培生…神龙摆尾吖嘞！(钟培生拳手绰号系Almighty Dragon)」林作体重由67kg增磅到75kg，肌肉变得结实，状态大勇，展现「老鼠仔」嘅佢话，「最唔明钟培生话我搞好多小动作，意图嚟影响佢，其实我线上线下都系咁，我啤住佢都系好正常啫，唔通回避你的眼神咩！咁佢双手插袋、扁嘴之类我都可以解读佢紧张同埋恰我！」

成日改例拳赛细则，喺休息时间及拳手装备上都唔同咗。

擂台合约当日林作对打拳乜都唔识，所以只系签咗份简单擂台战合约。

不满系咁改赛制

钟培生话林作有好多小动作，后者就提出3点反控诉Derek三番四次改赛制：「由口头承诺到签约，喺8月30日及上周3(9月8日)仲不停喺度改紧，最重要口头话可以戴头盔，后来以画面划一为理由唔准戴；休息时间由两分钟变回一分钟；第三点要提问，究竟今次系专业赛定表演赛？又讲得唔清楚，如果系专业赛，点解就连拳套都唔符合专业赛拳手装备？而我好肯定当日签𠮶份合约系业余比赛合约，但当时冇列明细则。」教练补充说：「虽然喺奥运成人男子组比赛都弃用头盔，但儿童组、青少年及女子组都会戴，咁钟培生口中嘅林作系Girl friend(女人)，点解唔喺安全情况下畀林作打足4个回合？有头盔保护好啲，打拳击出现过头撼头，万一有意外受伤，对钟培生搞嘅event都唔好啦！另随行团队人数上都变嚟变去，𠵱家话连埋我只可有3人，感觉龙门任搬安排有少少混乱，影响到我帮林作嘅策略性安排，唔戴头盔又有另一种打法！反而佢系一张白纸，对佢冇影响，好讲佢临场发挥。」

笑Derek压力大

虽然系咁改游戏规则但林作嘻皮笑脸话唔担心：「可能佢搞拳赛好辛苦，精神压力愈嚟愈大，我见佢呢几个月嘅气场愈嚟愈差，可能因为咁要改规则嚟保护自己多啲！我有好多招数乜都搞得掂！」林作形容钟培生系只芝娃娃(狗)，他系狗主：「如果佢听话就唔使搞咁多嘢，但佢吠同咬人就要教训佢嘞！」