港闻

娱乐

最Hit

即时

中国

国际

星岛申诉王

财经

地产

生活

健康

教育

体育

大湾区

专栏

马经

PLUS

【头条独家】63岁仲有人要自言执到鲁振顺跪地帮未婚妻着绣花鞋

即时娱乐

更新时间：07:55 2021-07-05 HKT
发布时间：22:00 2021-07-04 HKT

就算男儿膝下有黄金，阿旦对住Julie，唔介意单膝跪地。

缘份嘅嘢真系好奇妙，63岁「TVB绿叶王」鲁振顺(卤水旦)Dry咗10多年，失惊冇神同年轻6岁，从事保险业嘅Julie挞著，火速展开一段「黄昏恋」，明年10月将做「老衬」。日前两人手拖手去拣裙褂，其间阿旦不停搞烂gag，见老婆身形大份着唔落现成货，就笑住大赞老婆好生养，坐得好稳，搞到未婚妻笑唔停。采访：方骞平摄影：张咏森场地：凤黄绣庄@金巴利道

鲁振顺同Julie试中式礼服，阿旦贴心照顾未婚妻，好sweet。

Julie眼中阿旦系大男人，拣裙褂都会畀意见。

拣裙褂期间，阿旦预习点样去做暖男老公，除咗拖出拖入，又跪地协助老婆着绣花鞋，见老婆热热哋，就帮老婆拨凉，笑言：「妻凉！」𠱁到Julie四万咁口，情不自禁从后揽实阿旦，sweet到爆！

未婚妻证实非常大男人
原来呢段黄昏情缘系女追男，早于41年前两人曾一齐参加歌星选拔赛，当时大家唔熟之后亦冇再联络。去年Julie被阿旦嘅演出及多段真诚访问感动，主动出击，她强调：「其实我对人要求都好高，真系睇吓值唔值得联络先揾佢，我觉得佢个人好好，最欣赏佢好正人君子，初时佢唔信我，坐佢架车要坐车尾，坐咗成个月，直至圣诞前夕先肯拎开放喺司机位隔离嘅背囊畀我坐。」阿旦大笑说：「我当佢系我老细啫！」

试试吓衫，Julie情不自禁从后揽实阿旦。

阿旦演东方不败、大太监等入型入格，令大家怀疑他的性取向。

鲁振顺曾被误会性取向，Julie即解密：「我唔觉得佢系，佢只系感情细腻一啲，可能演东方不败太入型入格，深入民心，我接触佢好大男人。」语毕即补充：「但我OK，因为我钟意做小女人，做小女人系幸福嘅。仲有，就算佢10几年冇绯闻唔代表冇人吼，可能佢要求高，𠵱家先揾到我。」阿旦乘机发表爱的宣言：「系呀，之前我好可怜！揾个安心老婆好重要系男人心声。虽然相逢恨晚，但𠵱家最重要系有健康，步入中老年，大前题系养生，其他冇得强求，有佢要我，我经已执到啦！」