【头条独家】30岁转新公司好大感触吴业坤恨拍拖唱开心情歌

即时娱乐

更新时间：19:19 2020-05-10 HKT
发布时间：19:07 2020-05-10 HKT

同JW曾合唱《原来只因深爱著》好有火花，估唔到做埋同门师姐弟。

上月18日系吴业坤30岁牛一，今年初转咗新唱片公司Sunny Idea，坤哥表示30岁系人生checkpoint，感受好大，加上转公司，思想又唔同咗，希望稳稳阵阵继续做演艺事业，畀人感受到他成熟一面，「因为踏入新嘅岁数字头，唔可以再话自己系小朋友，要努力呀。」采访：方骞平髪型：Ken Yong@Hair Corner k11artmall 服装：Heron Preston@D-mop 场地：TIRPSE

赵慧珊系坤哥的13个绯闻女友之一。

坤哥唔打算大搞生日会，有妈咪陪住就够。

喺疫情下吴业坤唔打算大搞生日会：「记得25岁搞过生日会，原来都系好空虚嘅。」至于生日愿望，他只希望签新唱片公司后踏实工作，唱多啲好歌：「一直想唱吓用嚟表白、用于结婚嘅甜蜜情歌，既然我跟同公司嘅JW都咁开心咁Sweet，有机会就一齐做一啲咁嘅歌啦。」

唔拣圈中人拍拖
口快快自爆好Sweet的坤哥打圆场否认有拖拍：「即系自己好欢乐，唔使有太多惨情歌，但欢乐都有好多层面，JW咁Sweet，都想偷佢少少甜蜜。」坤哥好希望拍拖，并表示正努力中。问到是否有对象？坤哥笑言感兴趣嘅人一定有，「话冇你都唔信啦！」坤哥坦言心仪嘅女仔有好多，「但绝对唔系渔翁撒网，心入面有谂过呢个女仔都唔错，不过确定先同对方表白，但唔会系圈中人，感觉上同圈中人拍拖，圈子重叠会变得好复杂，一个艺人绯闻经已够多，如果两个艺人加埋一齐，条绯闻线就愈嚟愈长，经历过16年时嘅是是非非，做乜都错，仲讲到我有13个圈中女友，𠵱家变得好避忌，只想喺技艺上被认同有价值。」