【头条戏场】《圣欲》睇到面红修女She She情

更新时间：20:49 2021-09-10 HKT
发布时间：07:15 2021-09-11 HKT

Benedetta(右)同野性修女Bartolomea(Daphné Patakia饰)，留意前者拎住个圣母像，用途好广泛。

首先要赞吓香港译名，一睇就知套戏讲乜然后好想入场，成功吖。电影讲述17世纪意大利文艺复兴时期一间修道院内两位女同志的情欲故事，冇错，即系修女「she she情」，请嚟Virginie Efira及「英国资深影后」Charlotte Rampling主演，留意返，电影根据17世纪的真实历史纪录改编，即系件事真系发生过。电影于康城影展首映，并参与金棕榈奖的角逐，散场获得全场观众起立鼓掌五分钟，烂番茄新鲜度有85%。亲身观影感觉，真系好「甜」，睇到面红。(已上映) 撰文:廖思慧

Benedetta成日都话自己见到耶稣。

Bartolomea逃逗完Benedetta，后者即去告解。

荷兰名导Paul Verhoeven系90年代当时得令的导演，拍过《本能》、《铁甲威龙》同《宇宙威龙》等，近年就有《烈女本色》。戏中女角Benedetta(Virginie Efira饰)成长于修道院，在神的圣宠下，佢不但能见到神圣异象，身上更出现圣痕。有一日，佢被年轻又野性的见习修女挑逗，内心瞓咗好耐嘅毒蛇被整醒，初试肉体欢愉一发不可收拾。

Benedetta两只手掌都流紧血，大家都认为系圣痕。

梵蒂冈神职人员认为Benedetta讲大话而要烧佢。

127分钟话咁快就过
当然好多人以为自己做过嘅嘢冇人知，其实天知地知你知我知，因为圣痕而升上神枱的Benedetta被有心人监视，演变成权力斗争。电影精彩在于导演野心超大，戏中有大量对宗教嘅嘲讽，好寸又好好笑，一路睇一路担心导演。故事好有惊喜，片长127分钟完全唔觉，咪以为难得修女「She She恋」会好可歌可泣，唔系啰。点解导演会拍套咁踩界嘅电影?佢就咁讲:「17世纪时嘅社会由男性主导，女性除咗满足男性嘅性欲及生殖需求外一文不值，亦冇任何权力；但Benedetta运用自己的才能、远见、手段、谎言及创造力，成功登上权位，不但被视作圣人，也出任修道院嘅院长，声名远播。」简单嚟讲，因为聪明而引起导演的兴趣。