【好脚头】月中「升呢」爷爷乔宝宝返苏格兰前赴美登台掘金兼逗利是

更新时间：06:13 2021-08-03 HKT
发布时间：00:31 2021-08-03 HKT

宝宝返苏格兰抱孙前，转飞美国RENO PEPPERMILL演出一场talk Show。

喺今个月中「升呢」做爷爷嘅乔宝宝，孙BB真好好脚头，之前他留港两个多月赚钱，返英国苏格兰抱孙前再走多转掘金，转飞美国RENO PEPPERMILL演出一场talk Show，当晚吸引咗唔少华人客捧场。生鬼嘅乔宝宝唔止唱出多首串烧「饮歌」，仲大搞烂Gag，自爆读书时媾女同学及盲婚哑嫁，同老妈子睇相拣老婆趣事，观众睇得相当enjoy，笑声、欢呼声不绝，开心到系咁畀利是，利是数量多到成个纸袋都塞到满，利是入面内容有5、10、20、100蚊美金，宝宝show后加插拆利是，拆足几粒钟嘅开心情节，真系劲兴奋。收入咁可观，返到屋企会识做地「醒」老婆、两个囝囝、新抱及内孙厚礼。

当晚他一上台即搞笑热身：「今晚有游戏、唱歌、送礼，仲有亲笔签名相，亲笔签名相香港仲未有得炒住㗎！」惹来全场欢笑声。他又多谢咁多华人喺疫情下都嚟支持他。

𠱁得观众咁开心梗系豪畀利是。

利是多到要拆足几粒钟。

搞烂gag观众笑到拍烂手掌

提到中学点滴，他自爆学校有两个香港女同学：「我见到有个靓女好似关芝琳咁非常靓，我以前都好畀心机读书同打波，但见到佢之后经已堕入情网，每日会问佢借间尺、擦子胶、铅笔...搞到佢举手话畀老师听我骚扰佢，阿Sir叫咗我坐去最前，但咁样阻止唔到我去媾佢，翌日我摆咗块镜同埋本书去望住佢。每次放学时候我会跟住佢，哈！其实我想佢安全，因为其他同学都好想媾佢。我仲嗌阿妈子早一个钟头嗌我起身，我阿妈好开心，以为个仔好畀心机读书。」

他续说媾女技俩：「其实我去到佢屋企楼下，见到佢背面经已好开心，搭地铁佢喺A闸出，我就喺B闸出，然后行快两步扮绑鞋带，扮有缘相遇，但久而久之佢觉得我好烦，转第二个出口走，但我都照样走去另一个出口，然后跑过去跟住佢...佢忍唔住话：『可唔可以转个借口？』于是我就扮执返起跌咗落地本书。我最开心系落雨天，我落汤鸡喺佢面前出现，佢好无奈话：『不如我遮埋你啦！』我最开心举伞时我膊头擦到佢膊头...佢话：『我哋唔好黐得咁埋呀！我哋仲喺同学嚟咋！』」

宝宝好快四代同堂，恭喜晒。

宝宝好爱锡姐姐个孙。

唔拣百万「肥西施」怕被砸亲

另外，台上女司仪知道他跟老婆盲婚哑嫁结婚，但两人honey前darling后，问到点样Keep住咁好关系呢？宝宝大笑说：「我系印度韦小宝。身边有好多女士们，所以唔记得老婆叫乜名，惟有叫佢honey同darling。如果老婆成日听到个老公咁样叫唤，快啲问返个老公自己叫乜名！我哋印度人系一夫一妻制，但女朋友唔计！」此语一出惹来全场欢呼声及尖叫声。他又大谈当日睇相拣老婆笑料，因为其中一个被喻为百万富婆英国印度西施，但年龄方面较他大10年！他即耍手拧头：「我话带我老婆出街时，都唔知话畀人听，佢系我老婆定系我阿妈呀？同埋佢体重比较肥，我恐怕洞房时佢会砸亲我！因为我钟意玩女上男下嘅！」