【唔系呀嘛】质疑女神陈欣妍外貌进化史乔宝宝：系咪普通师奶咋？

更新时间：23:21 2020-09-30 HKT
发布时间：20:19 2020-09-30 HKT

陈欣妍同乔宝宝合作拍中印独立电影《我男友系好差》，他猛赞对方好索。

啱啱返咗去苏格兰同老婆及儿子「交人」嘅乔宝宝，离港前鬼咁开心，因为可以同到样靓身材正，34C「女神」陈欣妍（Shirley）合作拍中印独立电影《我男友系好差》，有额外「花红」梗系特别醒神啦！既然一拍即合，两人仲话升呢上契做埋契父女添，感情真系好到不得了㗎！不过，所谓「人怕出名猪怕肥」，喺疫情下仍然频接广告嘅「女神」Shirley即被大踼爆，揾返佢喺2016年出道前3年(原名陈曼姿)嘅旧相嚟对比，相中不论鼻梁、下巴、面型都判若两人，尤其冇咗惊吓嘅阔大猪胆鼻，完全改做成为另一个人咁！同19岁时比较，Shirley完全系经历过宇宙超级大进化！

同一个角度，陈欣妍连眼神都相同，但个样就唔同晒。

冇咗当日吓人猪胆鼻。

反问点解会争咁远
头条娱乐记者考吓宝宝眼光，畀7年前Shirley参加铜锣湾地带「型男潮女大赛」参赛相畀乔宝宝睇，问吓佢知唔知相中人系边个？宝宝不以为意回答：「普通人啰，普通师奶…估唔到呀！」记者只好畀贴士：「咩师奶呀？系女神呀？」乔宝宝即用怀疑声调，加埋唔多层次笑声反问：「唔系Shirley呀？哈哈哈哈…系咩？你哋点样发觉到系佢？点解会争咁远嘅？咁大转变嘅？点样转变得咁犀利呀？外国定系香港医生(整容)呀？完全两个人呀！𠮶医生一定发达啦！否则点解可以争咁远？我觉得系恶搞多啲，如果真系Shirley，应该一早就畀人踼爆咗啦…呢个世界真系有奇迹㗎！」

五官、身形完全唔同晒。

第一阶段进化经已冇咗猪胆鼻，下巴都变尖咗。

坚持上契唔会缩沙
隔咗阵，仲系难以置信嘅乔宝宝唔多「顺气」，主动揾返头条娱乐记者「理论」，语带坚定话：「我睇嚟睇去，到𠵱家都唔相信呢个系我女神呀！因为细睇连牙齿、身形都唔同晒，如果系真，咁佢都几懂得为自己部处，由样貌、牙齿、身形…全面改造先加入娱乐圈。」问到𠵱家宝宝仲会唔会视Shirley系女神，收佢做契女呢？宝宝坚决道：「照契！因为做任何一样嘢，有动摇就好难成功。佢系我女神，地位不变，因为佢真系索，而且始终唔相信相中人系佢，唯一惊叹科技发达及医生优质技术，可以令到一个人脱胎换骨。」咁宝宝可唔可以接受乔嫂嫂进化2.0？他则马上说不：「我对咗佢30年，如果一吓子改变，好难会接受。」