全球明星中抖音毒碧咸处女抖音片自称「小贝」卖萌

更新时间：04:11 2020-08-27 HKT
发布时间：16:07 2020-08-26 HKT

碧咸表示七字呢个数字对佢好重要。

呢期抖音同Tiktok好红，国家元首提起佢，国际新闻又讲起佢，其实抖音面世四年，早已疯魔全球，最新有万人迷碧咸都开设了抖音帐号「davidbeckham」，并上载了两条影片祝内地网友七夕快乐。

其中一段短片中咸爷大晒中文，用普通话向大家问好，又自称「小贝」，估唔到一向走型男路线的咸爷都可以咁Cute。之后碧咸用英文解释，「今日系七夕情人节，而七呢个号码对佢好重要，希望喺呢个特别嘅日子，将我嘅爱分享畀大家，并邀请大家参加我嘅抖音挑战，Show出你身边有关7字嘅号码。」最后双手更做出韩星至爱嘅畀心心手势，全片背景音乐系邓丽君的《甜蜜蜜》，成件事好九唔搭八，但好好笑。

第二段片就见到碧咸喺7号球衣上签名，而今次背景音乐就系周杰伦的《简单爱》，最后佢再次用普通话讲嘢：「我希望大家今天来抖音被爱包围。」忍唔住笑咗出声。

碧咸在7号球衣上签名，祝网友七夕快乐。

碧咸嫂Victoria好早已经玩抖音，仲同二公子Romeo拍抖音短片拍到跳晒舞。

席卷全球的抖音源于2016年，是一款音乐创意短片平台，是继Instagram、Facebook及Snapchat后火速冒起的社交平台，凭洗脑的「抖音神曲」与简单的「抖音挑战」在网上疯传，引起极大回响，如《学猫叫》及《Count on me》唱到街知巷闻，早前也有不少全球疯传的「抖音挑战」，如去年的「瓶盖挑战」及今年的「枕头挑战」（pillow challenge）等，因为太多人玩故亦吸引到亚洲明星以至荷里活明星都争相追捧。

Justin Bieber是超级抖音迷，超豪巨宅内每一忽都见过晒。

NBA球星字母哥(Giannis Antetokounmpo) 同老婆拍嘅搞笑短片亦可以喺抖音睇到。

抖音藉「名人效应」吸引大量用家，亦惹来不少争议。有传不少韩星的抖音帐号被封锁，包括Rain、TWICE及泫雅等，原因不明，令大量韩迷议论纷纷。除咗荷里活明星、韩星、内地红星和NBA球星都迷上玩抖音外，本港亦有不少艺人系抖音Fans，如陈山聪、林夏薇及何超莲等，不过抖音已撤出香港市场，冇得下载，就算曾经下载过都玩唔到，咁点解林夏薇仲玩到?点做到㗎?